Read Roman Urdu Geo zabūr 16 Bible Online

zabūr 16 - Roman Urdu Geo bible

zabūr 16

¹dāūd kā ek sunahrā zabūr. ai allāh, mujhe mahfūz rakh, kyūṅki tujh meṅ maiṅ panāh letā hūṅ.

²maiṅ ne rab se kahā, “tū merā āqā hai, tū hī merī ḳhushhālī kā wāhid sarchashmā hai.”

³mulk meṅ jo muqaddasīn haiṅ wuhī mere sūrme haiṅ, un hī ko maiṅ pasand kartā hūṅ.

⁴lekin jo dīgar mābūdoṅ ke pīchhe bhāge rahte haiṅ un kī taqlīf baṛhtī jāegī. na maiṅ un kī ḳhūn kī qurbāniyoṅ ko pesh karūṅga, na un ke nāmoṅ kā zikr tak karūṅga.

⁵ai rab, tū merī mīrās aur merā hissā hai. merā nasīb tere hāth meṅ hai.

⁶jab qur'ā ḍālā gayā to mujhe ḳhushgawār zamīn mil gaī. yaqīnan merī mīrās mujhe bahut pasand hai.

⁷maiṅ rab kī satāish karūṅga jis ne mujhe mashwarā diyā hai. rāt ko bhī merā dil merī hidāyat kartā hai.

⁸rab har waqt merī āṅkhoṅ ke sāmne rahtā hai. wuh mere dahne hāth rahtā hai, is lie maiṅ nahīṅ ḍagmagāūṅgā.

⁹is lie merā dil shādmān hai, merī jān ḳhushī ke nāre lagātī hai. hāṅ, merā badan pursukūn zindagī guzāregā.

¹⁰kyūṅki tū merī jān ko pātāl meṅ nahīṅ chhoṛegā, aur na apne muqaddas ko galne saṛne kī naubat tak pahuṅchne degā.

¹¹tū mujhe zindagī kī rāh se āgāh kartā hai. tere huzūr se bharpūr ḳhushiyāṅ, tere dahne hāth se abadī masarrateṅ hāsil hotī haiṅ.