Read Roman Urdu Geo zabūr 17 Bible Online

zabūr 17 - Roman Urdu Geo bible

zabūr 17

¹dāūd kī duā. ai rab, insāf ke lie merī faryād sun, merī āh-o-zārī par dhyān de. merī duā par ġhaur kar, kyūṅki wuh farebdih hoṅṭoṅ se nahīṅ nikaltī.

²tere huzūr merā insāf kiyā jāe, terī āṅkheṅ un bātoṅ kā mushāhadā kareṅ jo sach haiṅ.

³tū ne mere dil ko jāṅch liyā, rāt ko merā muāinā kiyā hai. tū ne mujhe bhaṭṭī meṅ ḍāl diyā tāki nāpāk chīzeṅ dūr kare, go aisī koī chīz nahīṅ milī. kyūṅki maiṅ ne pūrā irādā kar liyā hai ki mere muṅh se burī bāt nahīṅ niklegī.

⁴jo kuchh bhī dūsre karte haiṅ maiṅ ne ḳhud tere muṅh ke farmān ke tābe rah kar apne āp ko zālimoṅ kī rāhoṅ se dūr rakhā hai.

⁵maiṅ qadam-ba-qadam terī rāhoṅ meṅ rahā, mere pāoṅ kabhī na ḍagmagāe.

⁶ai allāh, maiṅ tujhe pukārtā hūṅ, kyūṅki tū merī sunegā. kān lagā kar merī duā ko sun.

⁷tū jo apne dahne hāth se unheṅ rihāī detā hai jo apne muḳhālifoṅ se tujh meṅ panāh lete haiṅ, mojizānā taur par apnī shafqat kā izhār kar.

⁸āṅkh kī putlī kī tarah merī hifāzat kar, apne paroṅ ke sāy meṅ mujhe chhupā le.

⁹un bedīnoṅ se mujhe mahfūz rakh jo mujh par tabāhkun hamle kar rahe haiṅ, un dushmanoṅ se jo mujhe gher kar mār ḍālne kī koshish kar rahe haiṅ.

¹⁰wuh sarkash ho gae haiṅ, un ke muṅh ghamanḍ kī bāteṅ karte haiṅ.

¹¹jidhar bhī ham qadam uṭhāeṅ wahāṅ wuh bhī pahuṅch jāte haiṅ. ab unhoṅ ne hameṅ gher liyā hai, wuh ghūr ghūr kar hameṅ zamīn par paṭaḳhne kā mauqā ḍhūnḍ rahe haiṅ.

¹²wuh us sherbabar kī mānind haiṅ jo shikār ko phāṛne ke lie taṛaptā hai, us jawān sher kī mānind jo tāk meṅ baiṭhā hai.

¹³ai rab, uṭh aur un kā sāmnā kar, unheṅ zamīn par paṭaḳh de! apnī talwār se merī jān ko bedīnoṅ se bachā.

¹⁴ai rab, apne hāth se mujhe in se chhuṭkārā de. unheṅ to is duniyā meṅ apnā hissā mil chukā hai. kyūṅki tū ne un ke peṭ ko apne māl se bhar diyā, balki un ke beṭe bhī ser ho gae haiṅ aur itnā bāqī hai ki wuh apnī aulād ke lie bhī kāfī kuchh chhoṛ jāeṅge.

¹⁵lekin maiṅ ḳhud rāstbāz sābit ho kar tere chehre kā mushāhadā karūṅga, maiṅ jāg kar terī sūrat se ser ho jāūṅgā.