Read Roman Urdu Geo zabūr 18 Bible Online

zabūr 18 - Roman Urdu Geo bible

zabūr 18

¹rab ke ḳhādim dāūd kā zabūr. mausīqī ke rāhnumā ke lie. dāūd ne rab ke lie yih gīt gāyā jab rab ne use tamām dushmanoṅ aur sāūl se bachāyā. wuh bolā, ai rab merī quwwat, maiṅ tujhe pyār kartā hūṅ.

²rab merī chaṭān, merā qilā aur merā najātdahindā hai. merā ḳhudā merī chaṭān hai jis meṅ maiṅ panāh letā hūṅ. wuh merī ḍhāl, merī najāt kā pahāṛ, merā buland hisār hai.

³maiṅ rab ko pukārtā hūṅ, us kī tamjīd ho! tab wuh mujhe dushmanoṅ se chhuṭkārā detā hai.

⁴maut ke rassoṅ ne mujhe gher liyā, halākat ke sailāb ne mere dil par dahshat tārī kī.

⁵pātāl ke rassoṅ ne mujhe jakaṛ liyā, maut ne mere rāste meṅ apne phande ḍāl die.

⁶jab maiṅ musībat meṅ phaṅs gayā to maiṅ ne rab ko pukārā. maiṅ ne madad ke lie apne ḳhudā se faryād kī to us ne apnī sukūnatgāh se merī āwāz sunī, merī chīḳheṅ us ke kān tak pahuṅch gaīṅ.

⁷tab zamīn laraz uṭhī aur thartharāne lagī, pahāṛoṅ kī bunyādeṅ rab ke ġhazab ke sāmne kāṅpne aur jhūlne lagīṅ.

⁸us kī nāk se dhuāṅ nikal āyā, us ke muṅh se bhasm karne wāle shole aur dahakte koele bhaṛak uṭhe.

⁹āsmān ko jhukā kar wuh nāzil huā. jab utar āyā to us ke pāoṅ ke nīche andherā hī andherā thā.

¹⁰wuh karūbī farishte par sawār huā aur uṛ kar hawā ke paroṅ par manḍlāne lagā.

¹¹us ne andhere ko apnī chhupne kī jagah banāyā, bārish ke kāle aur ghane bādal ḳhaime kī tarah apne girdāgird lagāe.

¹²us ke huzūr kī tez raushnī se us ke bādal ole aur sholāzan koele le kar nikal āe.

¹³rab āsmān se kaṛakne lagā, allāh t'ālā kī āwāz gūṅj uṭhī. tab ole aur sholāzan koele barasne lage.

¹⁴us ne apne tīr chalāe to dushman titar-bitar ho gae. us kī tez bijlī idhar udhar girtī gaī to un meṅ halchal mach gaī.

¹⁵ai rab, tū ne ḍānṭā to samundar kī wādiyāṅ zāhir huīṅ, jab tū ġhusse meṅ garjā to tere dam ke jhoṅkoṅ se zamīn kī bunyādeṅ nazar āīṅ.

¹⁶bulandiyoṅ par se apnā hāth baṛhā kar us ne mujhe pakaṛ liyā, mujhe gahre pānī meṅ se khaiṅch kar nikāl lāyā.

¹⁷us ne mujhe mere zabardast dushman se bachāyā, un se jo mujh se nafrat karte haiṅ, jin par maiṅ ġhālib na ā sakā.

¹⁸jis din maiṅ musībat meṅ phaṅs gayā us din unhoṅ ne mujh par hamlā kiyā, lekin rab merā sahārā banā rahā.

¹⁹us ne mujhe tang jagah se nikāl kar chhuṭkārā diyā, kyūṅki wuh mujh se ḳhush thā.

²⁰rab mujhe merī rāstbāzī kā ajr detā hai. mere hāth sāf haiṅ, is lie wuh mujhe barkat detā hai.

²¹kyūṅki maiṅ rab kī rāhoṅ par chaltā rahā hūṅ, maiṅ badī karne se apne ḳhudā se dūr nahīṅ huā.

²²us ke tamām ahkām mere sāmne rahe haiṅ, maiṅ ne us ke farmānoṅ ko radd nahīṅ kiyā.

²³us ke sāmne hī maiṅ be'ilzām rahā, gunāh karne se bāz rahā hūṅ.

²⁴is lie rab ne mujhe merī rāstbāzī kā ajr diyā, kyūṅki us kī āṅkhoṅ ke sāmne hī meṅ pāk-sāf sābit huā.

²⁵ai allāh, jo wafādār hai us ke sāth terā sulūk wafādārī kā hai, jo be'ilzām hai us ke sāth terā sulūk be'ilzām hai.

²⁶jo pāk hai us ke sāth terā sulūk pāk hai. lekin jo kajrau hai us ke sāth terā sulūk bhī kajrawī kā hai.

²⁷kyūṅki tū pasthāloṅ ko najāt detā aur maġhrūr āṅkhoṅ ko past kartā hai.

²⁸ai rab, tū hī merā charāġh jalātā, merā ḳhudā hī mere andhere ko raushan kartā hai.

²⁹kyūṅki tere sāth maiṅ faujī daste par hamlā kar saktā, apne ḳhudā ke sāth dīwār ko phalāṅg saktā hūṅ.

³⁰allāh kī rāh kāmil hai, rab kā farmān ḳhālis hai. jo bhī us meṅ panāh le us kī wuh ḍhāl hai.

³¹kyūṅki rab ke siwā kaun ḳhudā hai? hamāre ḳhudā ke siwā kaun chaṭān hai?

³²allāh mujhe quwwat se kamarbastā kartā, wuh merī rāh ko kāmil kar detā hai.

³³wuh mere pāoṅ ko hiran kī sī phurtī atā kartā, mujhe mazbūtī se merī bulandiyoṅ par khaṛā kartā hai.

³⁴wuh mere hāthoṅ ko jang karne kī tarbiyat detā hai. ab mere bāzū pītal kī kamān ko bhī tān lete haiṅ.

³⁵ai rab, tū ne mujhe apnī najāt kī ḍhāl baḳhsh dī hai. tere dahne hāth ne mujhe qāim rakhā, terī narmī ne mujhe baṛā banā diyā hai.

³⁶tū mere qadmoṅ ke lie rāstā banā detā hai, is lie mere ṭaḳhne nahīṅ ḍagmagāte.

³⁷maiṅ ne apne dushmanoṅ kā tāqqub karke unheṅ pakaṛ liyā, maiṅ bāz na āyā jab tak wuh ḳhatm na ho gae.

³⁸maiṅ ne unheṅ yūṅ pāsh pāsh kar diyā ki dubārā uṭh na sake balki gir kar mere pāoṅ tale paṛe rahe.

³⁹kyūṅki tū ne mujhe jang karne ke lie quwwat se kamarbastā kar diyā, tū ne mere muḳhālifoṅ ko mere sāmne jhukā diyā.

⁴⁰tū ne mere dushmanoṅ ko mere sāmne se bhagā diyā, aur maiṅ ne nafrat karne wāloṅ ko tabāh kar diyā.

⁴¹wuh madad ke lie chīḳhte chillāte rahe, lekin bachāne wālā koī nahīṅ thā. wuh rab ko pukārte rahe, lekin us ne jawāb na diyā.

⁴²maiṅ ne unheṅ chūr chūr karke gard kī tarah hawā meṅ uṛā diyā. maiṅ ne unheṅ kachre kī tarah galī meṅ phaiṅk diyā.

⁴³tū ne mujhe qaum ke jhagaṛoṅ se bachā kar aqwām kā sardār banā diyā hai. jis qaum se maiṅ nāwāqif thā wuh merī ḳhidmat kartī hai.

⁴⁴jūṅ hī maiṅ bāt kartā hūṅ to log merī sunte haiṅ. pardesī dabak kar merī ḳhushāmad karte haiṅ.

⁴⁵wuh himmat hār kar kāṅpte hue apne qiloṅ se nikal āte haiṅ.

⁴⁶rab zindā hai! merī chaṭān kī tamjīd ho! merī najāt ke ḳhudā kī tāzīm ho!

⁴⁷wuhī ḳhudā hai jo merā intiqām letā, aqwām ko mere tābe kar detā

⁴⁸aur mujhe mere dushmanoṅ se chhuṭkārā detā hai. yaqīnan tū mujhe mere muḳhālifoṅ par sarfarāz kartā, mujhe zālimoṅ se bachāe rakhtā hai.

⁴⁹ai rab, is lie maiṅ aqwām meṅ terī hamd-o-sanā karūṅga, tere nām kī tārīf meṅ gīt gāūṅgā.

⁵⁰kyūṅki rab apne bādshāh ko baṛī najāt detā hai, wuh apne masah kie hue bādshāh dāūd aur us kī aulād par hameshā tak mehrbān rahegā.