Read Roman Urdu Geo zabūr 19 Bible Online

zabūr 19 - Roman Urdu Geo bible

zabūr 19

¹dāūd kā zabūr. mausīqī ke rāhnumā ke lie. āsmān allāh ke jalāl kā elān karte haiṅ, āsmānī gumbad us ke hāthoṅ kā kām bayān kartā hai.

²ek din dūsre ko ittilā detā, ek rāt dūsrī ko ḳhabar pahuṅchātī hai,

³lekin zabān se nahīṅ. go un kī āwāz sunāī nahīṅ detī,

⁴to bhī un kī āwāz nikal kar pūrī duniyā meṅ sunāī detī, un ke alfāz duniyā kī intihā tak pahuṅch jāte haiṅ. wahāṅ allāh ne āftāb ke lie ḳhaimā lagāyā hai.

⁵jis tarah dūlhā apnī ḳhwābgāh se nikaltā hai usī tarah sūraj nikal kar pahalwān kī tarah apnī dauṛ dauṛne par ḳhushī manātā hai.

⁶āsmān ke ek sire se chaṛh kar us kā chakkar dūsre sire tak lagtā hai. us kī taptī garmī se koī bhī chīz poshīdā nahīṅ rahtī.

⁷rab kī sharīat kāmil hai, us se jān meṅ jān ā jātī hai. rab ke ahkām qābil-e-etimād haiṅ, un se sādālauh dānishmand ho jātā hai.

⁸rab kī hidāyāt bā-insāf haiṅ, un se dil bāġh bāġh ho jātā hai. rab ke ahkām pāk haiṅ, un se āṅkheṅ chamak uṭhtī haiṅ.

⁹rab kā ḳhauf pāk hai aur abad tak qāim rahegā. rab ke farmān sachche aur sab ke sab rāst haiṅ.

¹⁰wuh sone balki ḳhālis sone ke ḍher se zyādā marġhūb haiṅ. wuh shahd balki chhatte ke tāzā shahd se zyādā mīṭhe haiṅ.

¹¹un se tere ḳhādim ko āgāh kiyā jātā hai, un par amal karne se baṛā ajr miltā hai.

¹²jo ḳhatāeṅ beḳhabrī meṅ sarzad huīṅ kaun unheṅ jāntā hai? mere poshīdā gunāhoṅ ko muāf kar!

¹³apne ḳhādim ko gustākhoṅ se mahfūz rakh tāki wuh mujh par hukūmat na kareṅ. tab maiṅ be'ilzām ho kar sangīn gunāh se pāk rahūṅgā.

¹⁴ai rab, baḳhsh de ki mere muṅh kī bāteṅ aur mere dil kī soch-bichār tujhe pasand āe. tū hī merī chaṭān aur merā chhuṛāne wālā hai.