Read Roman Urdu Geo zabūr 20 Bible Online

zabūr 20 - Roman Urdu Geo bible

zabūr 20

¹dāūd kā zabūr. mausīqī ke rāhnumā ke lie. musībat ke din rab terī sune, yāqūb ke ḳhudā kā nām tujhe mahfūz rakhe.

²wuh maqdis se terī madad bheje, wuh siyyūn se terā sahārā bane.

³wuh terī ġhallā kī nazareṅ yād kare, terī bhasm hone wālī qurbāniyāṅ qabūl farmāe. (silāh)

⁴wuh tere dil kī ārzū pūrī kare, tere tamām mansūboṅ ko kāmyābī baḳhshe.

⁵tab ham terī najāt kī ḳhushī manāeṅge, ham apne ḳhudā ke nām meṅ fath kā jhanḍā gāṛeṅge. rab terī tamām guzārisheṅ pūrī kare.

⁶ab maiṅ ne jān liyā hai ki rab apne masah kie hue bādshāh kī madad kartā hai. wuh apne muqaddas āsmān se us kī sun kar apne dahne hāth kī qudrat se use chhuṭkārā degā.

⁷bāz apne rathoṅ par, bāz apne ghoṛoṅ par faḳhr karte haiṅ, lekin ham rab apne ḳhudā ke nām par faḳhr kareṅge.

⁸hamāre dushman jhuk kar gir jāeṅge, lekin ham uṭh kar mazbūtī se khaṛe raheṅge.

⁹ai rab, hamārī madad farmā! bādshāh hamārī sune jab ham madad ke lie pukāreṅ.