Read Roman Urdu Geo zabūr 21 Bible Online

zabūr 21 - Roman Urdu Geo bible

zabūr 21

¹dāūd kā zabūr. mausīqī ke rāhnumā ke lie. ai rab, bādshāh terī quwwat dekh kar shādmān hai, wuh terī najāt kī kitnī baṛī ḳhushī manātā hai.

²tū ne us kī dilī ḳhwāhish pūrī kī aur inkār na kiyā jab us kī ārzū ne hoṅṭoṅ par alfāz kā rūp dhārā. (silāh)

³kyūṅki tū achchhī achchhī barkateṅ apne sāth le kar us se milne āyā, tū ne use ḳhālis sone kā tāj pahnāyā.

⁴us ne tujh se zindagī pāne kī ārzū kī to tū ne use umr kī darāzī baḳhshī, mazīd itne din ki un kī intihā nahīṅ.

⁵terī najāt se use baṛī izzat hāsil huī, tū ne use shān-o-shaukat se ārāstā kiyā.

⁶kyūṅki tū use abad tak barkat detā, use apne chehre ke huzūr lā kar nihāyat ḳhush kar detā hai.

⁷kyūṅki bādshāh rab par etimād kartā hai, allāh t'ālā kī shafqat use ḍagmagāne se bachāegī.

⁸tere dushman tere qabze meṅ ā jāeṅge, jo tujh se nafrat karte haiṅ unheṅ terā dahnā hāth pakaṛ legā.

⁹jab tū un par zāhir hogā to wuh bhaṛaktī bhaṭṭī kī sī musībat meṅ phaṅs jāeṅge. rab apne ġhazab meṅ unheṅ haṛap kar legā, aur āg unheṅ khā jāegī.

¹⁰tū un kī aulād ko rū-e-zamīn par se miṭā ḍālegā, insānoṅ meṅ un kā nām-o-nishān tak nahīṅ rahegā.

¹¹go wuh tere ḳhilāf sāzisheṅ karte haiṅ to bhī un ke bure mansūbe nākām raheṅge.

¹²kyūṅki tū unheṅ bhagā kar un ke chehroṅ ko apne tīroṅ kā nishānā banā degā.

¹³ai rab, uṭh aur apnī qudrat kā izhār kar tāki ham terī qudrat kī tamjīd meṅ sāz bajā kar gīt gāeṅ.