Read Roman Urdu Geo zabūr 22 Bible Online

zabūr 22 - Roman Urdu Geo bible

zabūr 22

¹dāūd kā zabūr. mausīqī ke rāhnumā ke lie. tarz: tulū-e-subh kī hirnī. ai mere ḳhudā, ai mere ḳhudā, tū ne mujhe kyūṅ tark kar diyā hai? maiṅ chīḳh rahā hūṅ, lekin merī najāt nazar nahīṅ ātī.

²ai mere ḳhudā, din ko maiṅ chillātā hūṅ, lekin tū jawāb nahīṅ detā. rāt ko pukārtā hūṅ, lekin ārām nahīṅ pātā.

³lekin tū quddūs hai, tū jo isrāīl kī madahsarāī par taḳhtnashīn hotā hai.

⁴tujh par hamāre bāpdādā ne bharosā rakhā, aur jab bharosā rakhā to tū ne unheṅ rihāī dī.

⁵jab unhoṅ ne madad ke lie tujhe pukārā to bachne kā rāstā khul gayā. jab unhoṅ ne tujh par etimād kiyā to sharmindā na hue.

⁶lekin maiṅ kīṛā hūṅ, mujhe insān nahīṅ samjhā jātā. log merī be'izzatī karte, mujhe haqīr jānte haiṅ.

⁷sab mujhe dekh kar merā mazāq uṛāte haiṅ. wuh muṅh banā kar taubā taubā karte aur kahte haiṅ,

⁸“us ne apnā muāmalā rab ke sapurd kiyā hai. ab rab hī use bachāe. wuhī use chhuṭkārā de, kyūṅki wuhī us se ḳhush hai.”

⁹yaqīnan tū mujhe māṅ ke peṭ se nikāl lāyā. maiṅ abhī māṅ kā dūdh pītā thā ki tū ne mere dil meṅ bharosā paidā kiyā.

¹⁰jūṅ hī maiṅ paidā huā mujhe tujh par chhoṛ diyā gayā. māṅ ke peṭ se hī tū merā ḳhudā rahā hai.

¹¹mujh se dūr na rah. kyūṅki musībat ne merā dāman pakaṛ liyā hai, aur koī nahīṅ jo merī madad kare.

¹²muta'addid bailoṅ ne mujhe gher liyā, basan ke tāqatwar sānḍ chāroṅ taraf jamā ho gae haiṅ.

¹³mere ḳhilāf unhoṅ ne apne muṅh khol die haiṅ, us dahāṛte hue sherbabar kī tarah jo shikār ko phāṛne ke josh meṅ ā gayā hai.

¹⁴mujhe pānī kī tarah zamīn par unḍelā gayā hai, merī tamām haḍḍiyāṅ alag alag ho gaī haiṅ, jism ke andar merā dil mom kī tarah pighal gayā hai.

¹⁵merī tāqat ṭhīkre kī tarah ḳhushk ho gaī, merī zabān tālū se chipak gaī hai. hāṅ, tū ne mujhe maut kī ḳhāk meṅ liṭā diyā hai.

¹⁶kuttoṅ ne mujhe gher rakhā, sharīroṅ ke jaththe ne merā ihātā kiyā hai. unhoṅ ne mere hāthoṅ aur pāoṅ ko chhed ḍālā hai.

¹⁷maiṅ apnī haḍḍiyoṅ ko gin saktā hūṅ. log ghūr ghūr kar merī musībat se ḳhush hote haiṅ.

¹⁸wuh āpas meṅ mere kapṛe bāṅṭ lete aur mere libās par qur'ā ḍālte haiṅ.

¹⁹lekin tū ai rab, dūr na rah! ai merī quwwat, merī madad karne ke lie jaldī kar!

²⁰merī jān ko talwār se bachā, merī zindagī ko kutte ke panje se chhuṛā.

²¹sher ke muṅh se mujhe maḳhlasī de, janglī bailoṅ ke sīṅgoṅ se rihāī atā kar. ai rab, tū ne merī sunī hai!

²²maiṅ apne bhāiyoṅ ke sāmne tere nām kā elān karūṅga, jamā'at ke darmiyān terī madahsarāī karūṅga.

²³tum jo rab kā ḳhauf mānte ho, us kī tamjīd karo! ai yāqūb kī tamām aulād, us kā ehtirām kar! ai isrāīl ke tamām farzando, us se ḳhauf khāo!

²⁴kyūṅki na us ne musībatzadā kā dukh haqīr jānā, na us kī taqlīf se ghin khāī. us ne apnā muṅh us se na chhupāyā balki us kī sunī jab wuh madad ke lie chīḳhne-chillāne lagā.

²⁵ai ḳhudā, baṛe ijtimā meṅ maiṅ terī satāish karūṅga, ḳhudātarsoṅ ke sāmne apnī mannat pūrī karūṅga.

²⁶nāchār jī bhar kar khāeṅge, rab ke tālib us kī hamd-o-sanā kareṅge. tumhāre dil abad tak zindā raheṅ!

²⁷log duniyā kī intihā tak rab ko yād karke us kī taraf rujū kareṅge. ġhairaqwām ke tamām ḳhāndān use sijdā kareṅge.

²⁸kyūṅki rab ko hī bādshāhī kā iḳhtiyār hāsil hai, wuhī aqwām par hukūmat kartā hai.

²⁹duniyā ke tamām baṛe log us ke huzūr khāeṅge aur sijdā kareṅge. ḳhāk meṅ utarne wāle sab us ke sāmne jhuk jāeṅge, wuh sab jo apnī zindagī ko ḳhud qāim nahīṅ rakh sakte.

³⁰us ke farzand us kī ḳhidmat kareṅge. ek āne wālī nasl ko rab ke bāre meṅ sunāyā jāegā.

³¹hāṅ, wuh ā kar us kī rāstī ek qaum ko sunāeṅge jo abhī paidā nahīṅ huī, kyūṅki us ne yih kuchh kiyā hai.