Read Roman Urdu Geo zabūr 25 Bible Online

zabūr 25 - Roman Urdu Geo bible

zabūr 25

¹dāūd kā zabūr. ai rab, maiṅ terā ārzūmand hūṅ.

²ai mere ḳhudā, tujh par maiṅ bharosā rakhtā hūṅ. mujhe sharmindā na hone de ki mere dushman mujh par shādiyānā bajāeṅ.

³kyūṅki jo bhī tujh par ummīd rakhe wuh sharmindā nahīṅ hogā jabki jo bilāwajah bewafā hote haiṅ wuhī sharmindā ho jāeṅge.

⁴ai rab, apnī rāheṅ mujhe dikhā, mujhe apne rāstoṅ kī tālīm de.

⁵apnī sachchāī ke mutābiq merī rāhnumāī kar, mujhe tālīm de. kyūṅki tū merī najāt kā ḳhudā hai. din bhar maiṅ tere intizār meṅ rahtā hūṅ.

⁶ai rab, apnā wuh rahm aur mehrbānī yād kar jo tū qadīm zamāne se kartā āyā hai.

⁷ai rab, merī jawānī ke gunāhoṅ aur merī bewafā harkatoṅ ko yād na kar balki apnī bhalāī kī ḳhātir aur apnī shafqat ke mutābiq merā ḳhayāl rakh.

⁸rab bhalā aur ādil hai, is lie wuh gunāhgāroṅ ko sahīh rāh par chalne kī talqīn kartā hai.

⁹wuh farotanoṅ kī insāf kī rāh par rāhnumāī kartā, halīmoṅ ko apnī rāh kī tālīm detā hai.

¹⁰jo rab ke ahd aur ahkām ke mutābiq zindagī guzāreṅ unheṅ rab mehrbānī aur wafādārī kī rāhoṅ par le chaltā hai.

¹¹ai rab, merā qusūr sangīn hai, lekin apne nām kī ḳhātir use muāf kar.

¹²rab kā ḳhauf mānane wālā kahāṅ hai? rab ḳhud use us rāh kī tālīm degā jo use chunanā hai.

¹³tab wuh ḳhushhāl rahegā, aur us kī aulād mulk ko mīrās meṅ pāegī.

¹⁴jo rab kā ḳhauf māneṅ unheṅ wuh apne hamrāz banā kar apne ahd kī tālīm detā hai.

¹⁵merī āṅkheṅ rab ko taktī rahtī haiṅ, kyūṅki wuhī mere pāoṅ ko jāl se nikāl letā hai.

¹⁶merī taraf māil ho jā, mujh par mehrbānī kar! kyūṅki maiṅ tanhā aur musībatzadā hūṅ.

¹⁷mere dil kī pareshāniyāṅ dūr kar, mujhe merī takālīf se rihāī de.

¹⁸merī musībat aur tangī par nazar ḍāl kar merī ḳhatāoṅ ko muāf kar.

¹⁹dekh, mere dushman kitne zyādā haiṅ, wuh kitnā zulm karke mujh se nafrat karte haiṅ.

²⁰merī jān ko mahfūz rakh, mujhe bachā! mujhe sharmindā na hone de, kyūṅki maiṅ tujh meṅ panāh letā hūṅ.

²¹begunāhī aur diyānatdārī merī pahrādārī kareṅ, kyūṅki maiṅ tere intizār meṅ rahtā hūṅ.

²²ai allāh, fidyā de kar isrāīl ko us kī tamām takālīf se āzād kar!