Read Roman Urdu Geo zabūr 26 Bible Online

zabūr 26 - Roman Urdu Geo bible

zabūr 26

¹dāūd kā zabūr. ai rab, merā insāf kar, kyūṅki merā chāl-chalan bequsūr hai. maiṅ ne rab par bharosā rakhā hai, aur maiṅ ḍāṅwāṅḍol nahīṅ ho jāūṅgā.

²ai rab, mujhe jāṅch le, mujhe āzmā kar dil kī tah tak merā muāinā kar.

³kyūṅki terī shafqat merī āṅkhoṅ ke sāmne rahī hai, maiṅ terī sachchī rāh par chaltā rahā hūṅ.

⁴na maiṅ dhokebāzoṅ kī majlis meṅ baiṭhtā, na chālāk logoṅ se rifāqat rakhtā hūṅ.

⁵mujhe sharīroṅ ke ijtimāoṅ se nafrat hai, bedīnoṅ ke sāth maiṅ baiṭhtā bhī nahīṅ.

⁶ai rab, maiṅ apne hāth dho kar apnī begunāhī kā izhār kartā hūṅ. maiṅ terī qurbāngāh ke gird phir kar

⁷buland āwāz se terī hamd-o-sanā kartā, tere tamām mojizāt kā elān kartā hūṅ.

⁸ai rab, terī sukūnatgāh mujhe pyārī hai, jis jagah terā jalāl ṭhahartā hai wuh mujhe azīz hai.

⁹merī jān ko mujh se chhīn kar mujhe gunāhgāroṅ meṅ shāmil na kar! merī zindagī ko miṭā kar mujhe ḳhūṅḳhwāroṅ meṅ shumār na kar,

¹⁰aise logoṅ meṅ jin ke hāth sharmnāk harkatoṅ se ālūdā haiṅ, jo har waqt rishwat khāte haiṅ.

¹¹kyūṅki maiṅ begunāh zindagī guzārtā hūṅ. fidyā de kar mujhe chhuṭkārā de! mujh par mehrbānī kar!

¹²mere pāoṅ hamwār zamīn par qāim ho gae haiṅ, aur maiṅ ijtimāoṅ meṅ rab kī satāish karūṅga.