Read Roman Urdu Geo zabūr 27 Bible Online

zabūr 27 - Roman Urdu Geo bible

zabūr 27

¹dāūd kā zabūr. rab merī raushnī aur merī najāt hai, maiṅ kis se ḍarūṅ? rab merī jān kī panāhgāh hai, maiṅ kis se dahshat khāūṅ?

²jab sharīr mujh par hamlā kareṅ tāki mujhe haṛap kar leṅ, jab mere muḳhālif aur dushman mujh par ṭūṭ paṛeṅ to wuh ṭhokar khā kar gir jāeṅge.

³go fauj mujhe gher le merā dil ḳhauf nahīṅ khāegā, go mere ḳhilāf jang chhiṛ jāe merā bharosā qāim rahegā.

⁴rab se merī ek guzārish hai, maiṅ ek hī bāt chāhtā hūṅ. yih ki jīte jī rab ke ghar meṅ rah kar us kī shafqat se lutfandoz ho sakūṅ, ki us kī sukūnatgāh meṅ ṭhahar kar mahw-e-ḳhyāl rah sakūṅ.

⁵kyūṅki musībat ke din wuh mujhe apnī sukūnatgāh meṅ panāh degā, mujhe apne ḳhaime meṅ chhupā legā, mujhe uṭhā kar ūṅchī chaṭān par rakhegā.

⁶ab maiṅ apne dushmanoṅ par sarbuland hūṅgā, agarche unhoṅ ne mujhe gher rakhā hai. maiṅ us ke ḳhaime meṅ ḳhushī ke nāre lagā kar qurbāniyāṅ pesh karūṅga, sāz bajā kar rab kī madahsarāī karūṅga.

⁷ai rab, merī āwāz sun jab maiṅ tujhe pukārūṅ, mujh par mehrbānī karke merī sun.

⁸merā dil tujhe yād dilātā hai ki tū ne ḳhud farmāyā, “mere chehre ke tālib raho!” ai rab, maiṅ tere hī chehre kā tālib rahā hūṅ.

⁹apne chehre ko mujh se chhupāe na rakh, apne ḳhādim ko ġhusse se apne huzūr se na nikāl. kyūṅki tū hī merā sahārā rahā hai. ai merī najāt ke ḳhudā, mujhe na chhoṛ, mujhe tark na kar.

¹⁰kyūṅki mere māṅ-bāp ne mujhe tark kar diyā hai, lekin rab mujhe qabūl karke apne ghar meṅ lāegā.

¹¹ai rab, mujhe apnī rāh kī tarbiyat de, hamwār rāste par merī rāhnumāī kar tāki apne dushmanoṅ se mahfūz rahūṅ.

¹²mujhe muḳhālifoṅ ke lālach meṅ na āne de, kyūṅki jhūṭe gawāh mere ḳhilāf uṭh khaṛe hue haiṅ jo tashaddud karne ke lie tayyār haiṅ.

¹³lekin merā pūrā īmān yih hai ki maiṅ zindoṅ ke mulk meṅ rah kar rab kī bhalāī dekhūṅgā.

¹⁴rab ke intizār meṅ rah! mazbūt aur diler ho, aur rab ke intizār meṅ rah!