Read Roman Urdu Geo zabūr 30 Bible Online

zabūr 30 - Roman Urdu Geo bible

zabūr 30

¹dāūd kā zabūr. rab ke ghar kī maḳhsūsiyat ke mauqe par gīt. ai rab, maiṅ terī satāish kartā hūṅ, kyūṅki tū ne mujhe gahrāiyoṅ meṅ se khaiṅch nikālā. tū ne mere dushmanoṅ ko mujh par baġhleṅ bajāne kā mauqā nahīṅ diyā.

²ai rab mere ḳhudā, maiṅ ne chīḳhte chillāte hue tujh se madad māṅgī, aur tū ne mujhe shifā dī.

³ai rab, tū merī jān ko pātāl se nikāl lāyā, tū ne merī jān ko maut ke gaṛhe meṅ utarne se bachāyā hai.

⁴ai īmāndāro, sāz bajā kar rab kī tārīf meṅ gīt gāo. us ke muqaddas nām kī hamd-o-sanā karo.

⁵kyūṅki wuh lamhā bhar ke lie ġhusse hotā, lekin zindagī bhar ke lie mehrbānī kartā hai. go shām ko ronā paṛe, lekin subh ko ham ḳhushī manāeṅge.

⁶jab hālāt pursukūn the to maiṅ bolā, “maiṅ kabhī nahīṅ ḍagmagāūṅgā.”

⁷ai rab, jab tū mujh se ḳhush thā to tū ne mujhe mazbūt pahāṛ par rakh diyā. lekin jab tū ne apnā chehrā mujh se chhupā liyā to maiṅ saḳht ghabrā gayā.

⁸ai rab, maiṅ ne tujhe pukārā, hāṅ ḳhudāwand se maiṅ ne iltijā kī,

⁹“kyā fāidā hai agar maiṅ halāk ho kar maut ke gaṛhe meṅ utar jāūṅ? kyā ḳhāk terī satāish karegī? kyā wuh logoṅ ko terī wafādārī ke bāre meṅ batāegī?

¹⁰ai rab, merī sun, mujh par mehrbānī kar. ai rab, merī madad karne ke lie ā!”

¹¹tū ne merā mātam ḳhushī ke nāch meṅ badal diyā, tū ne mere mātamī kapṛe utār kar mujhe shādmānī se mulabbas kiyā.

¹²kyūṅki tū chāhtā hai ki merī jān ḳhāmosh na ho balki gīt gā kar terī tamjīd kartī rahe. ai rab mere ḳhudā, maiṅ abad tak terī hamd-o-sanā karūṅga.