Read Roman Urdu Geo zabūr 31 Bible Online

zabūr 31 - Roman Urdu Geo bible

zabūr 31

¹dāūd kā zabūr. mausīqī ke rāhnumā ke lie. ai rab, maiṅ ne tujh meṅ panāh lī hai. mujhe kabhī sharmindā na hone de balki apnī rāstī ke mutābiq mujhe bachā!

²apnā kān merī taraf jhukā, jald hī mujhe chhuṭkārā de. chaṭān kā merā burj ho, pahāṛ kā qilā jis meṅ maiṅ panāh le kar najāt pā sakūṅ.

³kyūṅki tū merī chaṭān, merā qilā hai, apne nām kī ḳhātir merī rāhnumāī, merī qiyādat kar.

⁴mujhe us jāl se nikāl de jo mujhe pakaṛne ke lie chupke se bichhāyā gayā hai. kyūṅki tū hī merī panāhgāh hai.

⁵maiṅ apnī rūh tere hāthoṅ meṅ sauṅptā hūṅ. ai rab, ai wafādār ḳhudā, tū ne fidyā de kar mujhe chhuṛāyā hai!

⁶maiṅ un se nafrat rakhtā hūṅ jo bekār butoṅ se lipṭe rahte haiṅ. maiṅ to rab par bharosā rakhtā hūṅ.

⁷maiṅ bāġh bāġh hūṅgā aur terī shafqat kī ḳhushī manāūṅgā, kyūṅki tū ne merī musībat dekh kar merī jān kī pareshānī kā ḳhayāl kiyā hai.

⁸tū ne mujhe dushman ke hawāle nahīṅ kiyā balki mere pāoṅ ko khule maidān meṅ qāim kar diyā hai.

⁹ai rab, mujh par mehrbānī kar, kyūṅki maiṅ musībat meṅ hūṅ. ġham ke māre merī āṅkheṅ sūj gaī haiṅ, merī jān aur jism gal rahe haiṅ.

¹⁰merī zindagī dukh kī chakkī meṅ pis rahī hai, mere sāl āheṅ bharte bharte zāe ho rahe haiṅ. mere qusūr kī wajah se merī tāqat jawāb de gaī, merī haḍḍiyāṅ galne saṛne lagī haiṅ.

¹¹maiṅ apne dushmanoṅ ke lie mazāq kā nishānā ban gayā hūṅ balki mere hamsāe bhī mujhe lān-tān karte, mere jānane wāle mujh se dahshat khāte haiṅ. galī meṅ jo bhī mujhe dekhe mujh se bhāg jātā hai.

¹²maiṅ murdoṅ kī mānind un kī yāddāsht se miṭ gayā hūṅ, mujhe ṭhīkre kī tarah phaiṅk diyā gayā hai.

¹³bahutoṅ kī afwāheṅ mujh tak pahuṅch gaī haiṅ, chāroṅ taraf se haulnāk ḳhabreṅ mil rahī haiṅ. wuh mil kar mere ḳhilāf sāzisheṅ kar rahe, mujhe qatl karne ke mansūbe bāndh rahe haiṅ.

¹⁴lekin maiṅ ai rab, tujh par bharosā rakhtā hūṅ. maiṅ kahtā hūṅ, “tū merā ḳhudā hai!”

¹⁵merī taqdīr [4] tere hāth meṅ hai. mujhe mere dushmanoṅ ke hāth se bachā, un se jo mere pīchhe paṛ gae haiṅ.

¹⁶apne chehre kā nūr apne ḳhādim par chamkā, apnī mehrbānī se mujhe najāt de.

¹⁷ai rab, mujhe sharmindā na hone de, kyūṅki maiṅ ne tujhe pukārā hai. mere bajāe bedīnoṅ ke muṅh kāle ho jāeṅ, wuh pātāl meṅ utar kar chup ho jāeṅ.

¹⁸un ke farebdih hoṅṭ band ho jāeṅ, kyūṅki wuh takabbur aur hiqārat se rāstbāz ke ḳhilāf kufr bakte haiṅ.

¹⁹terī bhalāī kitnī azīm hai! tū use un ke lie tayyār rakhtā hai jo terā ḳhauf mānte haiṅ, use unheṅ dikhātā hai jo insānoṅ ke sāmne se tujh meṅ panāh lete haiṅ.

²⁰tū unheṅ apne chehre kī āṛ meṅ logoṅ ke hamloṅ se chhupā letā, unheṅ ḳhaime meṅ lā kar ilzāmtarāsh zabānoṅ se mahfūz rakhtā hai.

²¹rab kī tamjīd ho, kyūṅki jab shahr kā muhāsarā ho rahā thā to us ne mojizānā taur par mujh par mehrbānī kī.

²²us waqt maiṅ ghabrā kar bolā, “hāy, maiṅ tere huzūr se munqate ho gayā hūṅ!” lekin jab maiṅ ne chīḳhte chillāte hue tujh se madad māṅgī to tū ne merī iltijā sun lī.

²³ai rab ke tamām īmāndāro, us se muhabbat rakho! rab wafādāroṅ ko mahfūz rakhtā, lekin maġhrūroṅ ko un ke rawayye kā pūrā ajr degā.

²⁴chunāṅche mazbūt aur diler ho, tum sab jo rab ke intizār meṅ ho.