Read Roman Urdu Geo zabūr 33 Bible Online

zabūr 33 - Roman Urdu Geo bible

zabūr 33

¹ai rāstbāzo, rab kī ḳhushī manāo! kyūṅki munāsib hai ki sīdhī rāh par chalne wāle us kī satāish kareṅ.

²sarod bajā kar rab kī hamd-o-sanā karo. us kī tamjīd meṅ das tāroṅ wālā sāz bajāo.

³us kī tamjīd meṅ nayā gīt gāo, mahārat se sāz bajā kar ḳhushī ke nāre lagāo.

⁴kyūṅki rab kā kalām sachchā hai, aur wuh har kām wafādārī se kartā hai.

⁵use rāstbāzī aur insāf pyāre haiṅ, duniyā rab kī shafqat se bharī huī hai.

⁶rab ke kahne par āsmān ḳhalaq huā, us ke muṅh ke dam se sitāroṅ kā pūrā lashkar wujūd meṅ āyā.

⁷wuh samundar ke pānī kā baṛā ḍher jamā kartā, pānī kī gahrāiyoṅ ko godāmoṅ meṅ mahfūz rakhtā hai.

⁸kul duniyā rab kā ḳhauf māne, zamīn ke tamām bāshinde us se dahshat khāeṅ.

⁹kyūṅki us ne farmāyā to fauran wujūd meṅ āyā, us ne hukm diyā to usī waqt qāim huā.

¹⁰rab aqwām kā mansūbā nākām hone detā, wuh ummatoṅ ke irādoṅ ko shikast detā hai.

¹¹lekin rab kā mansūbā hameshā tak kāmyāb rahtā, us ke dil ke irāde pusht-dar-pusht qāim rahte haiṅ.

¹²mubārak hai wuh qaum jis kā ḳhudā rab hai, wuh qaum jise us ne chun kar apnī mīrās banā liyā hai.

¹³rab āsmān se nazar ḍāl kar tamām insānoṅ kā mulāhazā kartā hai.

¹⁴apne taḳht se wuh zamīn ke tamām bāshindoṅ kā muāinā kartā hai.

¹⁵jis ne un sab ke diloṅ ko tashkīl diyā wuh un ke tamām kāmoṅ par dhyān detā hai.

¹⁶bādshāh kī baṛī fauj use nahīṅ chhuṛātī, aur sūrme kī baṛī tāqat use nahīṅ bachātī.

¹⁷ghoṛā bhī madad nahīṅ kar saktā. jo us par ummīd rakhe wuh dhokā khāegā. us kī baṛī tāqat chhuṭkārā nahīṅ detī.

¹⁸yaqīnan rab kī āṅkh un par lagī rahtī hai jo us kā ḳhauf mānte aur us kī mehrbānī ke intizār meṅ rahte haiṅ,

¹⁹ki wuh un kī jān maut se bachāe aur kāl meṅ mahfūz rakhe.

²⁰hamārī jān rab ke intizār meṅ hai. wuhī hamārā sahārā, hamārī ḍhāl hai.

²¹hamārā dil us meṅ ḳhush hai, kyūṅki ham us ke muqaddas nām par bharosā rakhte haiṅ.

²²ai rab, terī mehrbānī ham par rahe, kyūṅki ham tujh par ummīd rakhte haiṅ.