Read Roman Urdu Geo zabūr 34 Bible Online

zabūr 34 - Roman Urdu Geo bible

zabūr 34

¹dāūd kā yih zabūr us waqt se mutālliq hai jab us ne filistī bādshāh abīmalik ke sāmne pāgal banane kā rūp bhar liyā. yih dekh kar bādshāh ne use bhagā diyā. chale jāne ke bād dāūd ne yih gīt gāyā. har waqt maiṅ rab kī tamjīd karūṅga, us kī hamd-o-sanā hameshā hī mere hoṅṭoṅ par rahegī.

²merī jān rab par faḳhr karegī. musībatzadā yih sun kar ḳhush ho jāeṅ.

³āo, mere sāth rab kī tāzīm karo. āo, ham mil kar us kā nām sarbuland kareṅ.

⁴maiṅ ne rab ko talāsh kiyā to us ne merī sunī. jin chīzoṅ se maiṅ dahshat khā rahā thā un sab se us ne mujhe rihāī dī.

⁵jin kī āṅkheṅ us par lagī raheṅ wuh ḳhushī se chamkeṅge, aur un ke muṅh sharmindā nahīṅ hoṅge.

⁶is nāchār ne pukārā to rab ne us kī sunī, us ne use us kī tamām musībatoṅ se najāt dī.

⁷jo rab kā ḳhauf māneṅ un ke irdgird us kā farishtā ḳhaimāzan ho kar un ko bachāe rakhtā hai.

⁸rab kī bhalāī kā tajribā karo. mubārak hai wuh jo us meṅ panāh le.

⁹ai rab ke muqaddasīn, us kā ḳhauf māno, kyūṅki jo us kā ḳhauf māneṅ unheṅ kamī nahīṅ.

¹⁰jawān sherbabar kabhī zarūratmand aur bhūke hote haiṅ, lekin rab ke tāliboṅ ko kisī bhī achchhī chīz kī kamī nahīṅ hogī.

¹¹ai bachcho, āo, merī bāteṅ suno! maiṅ tumheṅ rab ke ḳhauf kī tālīm dūṅgā.

¹²kaun maze se zindagī guzārnā aur achchhe din deḳhnā chāhtā hai?

¹³wuh apnī zabān ko sharīr bāteṅ karne se roke aur apne hoṅṭoṅ ko jhūṭ bolne se.

¹⁴wuh burāī se muṅh pher kar nek kām kare, sulah-salāmatī kā tālib ho kar us ke pīchhe lagā rahe.

¹⁵rab kī āṅkheṅ rāstbāzoṅ par lagī rahtī haiṅ, aur us ke kān un kī iltijāoṅ kī taraf māil haiṅ.

¹⁶lekin rab kā chehrā un ke ḳhilāf hai jo ġhalat kām karte haiṅ. un kā zamīn par nām-o-nishān tak nahīṅ rahegā.

¹⁷jab rāstbāz faryād kareṅ to rab un kī suntā, wuh unheṅ un kī tamām musībat se chhuṭkārā detā hai.

¹⁸rab shikastādiloṅ ke qarīb hotā hai, wuh unheṅ rihāī detā hai jin kī rūh ko ḳhāk meṅ kuchlā gayā ho.

¹⁹rāstbāz kī muta'addid takālīf hotī haiṅ, lekin rab use un sab se bachā letā hai.

²⁰wuh us kī tamām haḍḍiyoṅ kī hifāzat kartā hai, ek bhī nahīṅ toṛī jāegī.

²¹burāī bedīn ko mār ḍālegī, aur jo rāstbāz se nafrat kare use munāsib ajr milegā.

²²lekin rab apne ḳhādimoṅ kī jān kā fidyā degā. jo bhī us meṅ panāh le use sazā nahīṅ milegī.