Read Roman Urdu Geo zabūr 35 Bible Online

zabūr 35 - Roman Urdu Geo bible

zabūr 35

¹dāūd kā zabūr. ai rab, un se jhagaṛ jo mere sāth jhagaṛte haiṅ, un se laṛ jo mere sāth laṛte haiṅ.

²lambī aur chhoṭī ḍhāl pakaṛ le aur uṭh kar merī madad karne ā.

³neze aur barchhī ko nikāl kar unheṅ rok de jo merā tāqqub kar rahe haiṅ! merī jān se farmā, “maiṅ terī najāt hūṅ!”

⁴jo merī jān ke lie koshāṅ haiṅ un kā muṅh kālā ho jāe, wuh ruswā ho jāeṅ. jo mujhe musībat meṅ ḍālne ke mansūbe bāndh rahe haiṅ wuh pīchhe haṭ kar sharmindā hoṅ.

⁵wuh hawā meṅ bhūse kī tarah uṛ jāeṅ jab rab kā farishtā unheṅ bhagā de.

⁶un kā rāstā tārīk aur phisalnā ho jab rab kā farishtā un ke pīchhe paṛ jāe.

⁷kyūṅki unhoṅ ne besabab aur chupke se mere rāste meṅ jāl bichhāyā, bilāwajah mujhe pakaṛne kā gaṛhā khodā hai.

⁸is lie tabāhī achānak hī un par ā paṛe, pahle unheṅ patā hī na chale. jo jāl unhoṅ ne chupke se bichhāyā us meṅ wuh ḳhud ulajh jāeṅ, jis gaṛhe ko unhoṅ ne khodā us meṅ wuh ḳhud gir kar tabāh ho jāeṅ.

⁹tab merī jān rab kī ḳhushī manāegī aur us kī najāt ke bāis shādmān hogī.

¹⁰mere tamām āzā kah uṭheṅge, “ai rab, kaun terī mānind hai? koī bhī nahīṅ! kyūṅki tū hī musībatzadā ko zabardast ādmī se chhuṭkārā detā, tū hī nāchār aur ġharīb ko lūṭne wāle ke hāth se bachā letā hai.”

¹¹zālim gawāh mere ḳhilāf uṭh khaṛe ho rahe haiṅ. wuh aisī bātoṅ ke bāre meṅ merī pūchh-gachh kar rahe haiṅ jin se maiṅ wāqif hī nahīṅ.

¹²wuh merī nekī ke iwaz mujhe nuqsān pahuṅchā rahe haiṅ. ab merī jān tan-e-tanhā hai.

¹³jab wuh bīmār hue to maiṅ ne ṭāṭ oṛh kar aur rozā rakh kar apnī jān ko dukh diyā. kāsh merī duā merī god meṅ wāpas āe!

¹⁴maiṅ ne yūṅ mātam kiyā jaise merā koī dost yā bhāī ho. maiṅ mātamī libās pahan kar yūṅ ḳhāk meṅ jhuk gayā jaise apnī māṅ kā janāzā ho.

¹⁵lekin jab maiṅ ḳhud ṭhokar khāne lagā to wuh ḳhush ho kar mere ḳhilāf jamā hue. wuh mujh par hamlā karne ke lie ikaṭṭhe hue, aur mujhe mālūm hī nahīṅ thā. wuh mujhe phāṛte rahe aur bāz na āe.

¹⁶musalsal kufr bak bak kar wuh merā mazāq uṛāte, mere ḳhilāf dāṅt pīste the.

¹⁷ai rab, tū kab tak ḳhāmoshī se deḳhtā rahegā? merī jān ko un kī tabāhkun harkatoṅ se bachā, merī zindagī ko jawān sheroṅ se chhuṭkārā de.

¹⁸tab maiṅ baṛī jamā'at meṅ terī satāish aur baṛe hujūm meṅ terī tārīf karūṅga.

¹⁹unheṅ mujh par baġhleṅ bajāne na de jo besabab mere dushman haiṅ. unheṅ mujh par nāk-bhauṅ chaṛhāne na de jo bilāwajah mujh se kīnā rakhte haiṅ.

²⁰kyūṅki wuh ḳhair aur salāmatī kī bāteṅ nahīṅ karte balki un ke ḳhilāf farebdih mansūbe bāndhte haiṅ jo amn aur sukūn se mulk meṅ rahte haiṅ.

²¹wuh muṅh phāṛ kar kahte haiṅ, “lo jī, ham ne apnī āṅkhoṅ se us kī harkateṅ dekhī haiṅ!”

²²ai rab, tujhe sab kuchh nazar āyā hai. ḳhāmosh na rah! ai rab, mujh se dūr na ho.

²³ai rab mere ḳhudā, jāg uṭh. mere difā meṅ uṭh kar un se laṛ!

²⁴ai rab mere ḳhudā, apnī rāstī ke mutābiq merā insāf kar. unheṅ mujh par baġhleṅ bajāne na de.

²⁵wuh dil meṅ na socheṅ, “lo jī, hamārā irādā pūrā huā hai!” wuh na boleṅ, “ham ne use haṛap kar liyā hai.”

²⁶jo merā nuqsān dekh kar ḳhush hue un sab kā muṅh kālā ho jāe, wuh sharmindā ho jāeṅ. jo mujhe dabā kar apne āp par faḳhr karte haiṅ wuh sharmindagī aur ruswāī se mulabbas ho jāeṅ.

²⁷lekin jo mere insāf ke ārzūmand haiṅ wuh ḳhush hoṅ aur shādiyānā bajāeṅ. wuh kaheṅ, “rab kī baṛī tārīf ho, jo apne ḳhādim kī ḳhairiyat chāhtā hai.”

²⁸tab merī zabān terī rāstī bayān karegī, wuh sārā din terī tamjīd kartī rahegī.