Read Roman Urdu Geo zabūr 37 Bible Online

zabūr 37 - Roman Urdu Geo bible

zabūr 37

¹dāūd kā zabūr. sharīroṅ ke bāis bechain na ho jā, badkāroṅ par rashk na kar.

²kyūṅki wuh ghās kī tarah jald hī murjhā jāeṅge, hariyālī kī tarah jald hī sūkh jāeṅge.

³rab par bharosā rakh kar bhalāī kar, mulk meṅ rah kar wafādārī kī parwarish kar.

⁴rab se lutfandoz ho to jo terā dil chāhe wuh tujhe degā.

⁵apnī rāh rab ke sapurd kar. us par bharosā rakh to wuh tujhe kāmyābī baḳhshegā.

⁶tab wuh terī rāstbāzī sūraj kī tarah tulū hone degā aur terā insāf dopahar kī raushnī kī tarah chamakne degā.

⁷rab ke huzūr chup ho kar sabar se us kā intizār kar. beqarār na ho agar sāzisheṅ karne wālā kāmyāb ho.

⁸ḳhafā hone se bāz ā, ġhusse ko chhoṛ de. ranjīdā na ho, warnā burā hī natījā niklegā.

⁹kyūṅki sharīr miṭ jāeṅge jabki rab se ummīd rakhne wāle mulk ko mīrās meṅ pāeṅge.

¹⁰mazīd thoṛī der sabar kar to bedīn kā nām-o-nishān miṭ jāegā. tū us kā khoj lagāegā, lekin kahīṅ nahīṅ pāegā.

¹¹lekin halīm mulk ko mīrās meṅ pā kar baṛe amn aur sukūn se lutfandoz hoṅge.

¹²beshak bedīn dāṅt pīs pīs kar rāstbāz ke ḳhilāf sāzisheṅ kartā rahe.

¹³lekin rab us par haṅstā hai, kyūṅki wuh jāntā hai ki us kā anjām qarīb hī hai.

¹⁴bedīnoṅ ne talwār ko khaiṅchā aur kamān ko tān liyā hai tāki nāchāroṅ aur zarūratmandoṅ ko girā deṅ aur sīdhī rāh par chalne wāloṅ ko qatl kareṅ.

¹⁵lekin un kī talwār un ke apne dil meṅ ghoṅpī jāegī, un kī kamān ṭūṭ jāegī.

¹⁶rāstbāz ko jo thoṛā bahut hāsil hai wuh bahut bedīnoṅ kī daulat se behtar hai.

¹⁷kyūṅki bedīnoṅ kā bāzū ṭūṭ jāegā jabki rab rāstbāzoṅ ko saṅbhāltā hai.

¹⁸rab be'ilzāmoṅ ke din jāntā hai, aur un kī maurūsī milkiyat hameshā ke lie qāim rahegī.

¹⁹musībat ke waqt wuh sharmsār nahīṅ hoṅge, kāl bhī paṛe to ser hoṅge.

²⁰lekin bedīn halāk ho jāeṅge, aur rab ke dushman charāgāhoṅ kī shān kī tarah nest ho jāeṅge, dhueṅ kī tarah ġhāib ho jāeṅge.

²¹bedīn qarz letā aur use nahīṅ utārtā, lekin rāstbāz mehrbān hai aur fayyāzī se detā hai.

²²kyūṅki jinheṅ rab barkat de wuh mulk ko mīrās meṅ pāeṅge, lekin jin par wuh lānat bheje un kā nām-o-nishān tak nahīṅ rahegā.

²³agar kisī ke pāoṅ jam jāeṅ to yih rab kī taraf se hai. aise shaḳhs kī rāh ko wuh pasand kartā hai.

²⁴agar gir bhī jāe to paṛā nahīṅ rahegā, kyūṅki rab us ke hāth kā sahārā banā rahegā.

²⁵maiṅ jawān thā aur ab būṛhā ho gayā hūṅ. lekin maiṅ ne kabhī nahīṅ dekhā ki rāstbāz ko tark kiyā gayā yā us ke bachchoṅ ko bhīk māṅgnī paṛī.

²⁶wuh hameshā mehrbān aur qarz dene ke lie tayyār hai. us kī aulād barkat kā bāis hogī.

²⁷burāī se bāz ā kar bhalāī kar. tab tū hameshā ke lie mulk meṅ ābād rahegā,

²⁸kyūṅki rab ko insāf pyārā hai, aur wuh apne īmāndāroṅ ko kabhī tark nahīṅ karegā. wuh abad tak mahfūz raheṅge jabki bedīnoṅ kī aulād kā nām-o-nishān tak nahīṅ rahegā.

²⁹rāstbāz mulk ko mīrās meṅ pā kar us meṅ hameshā baseṅge.

³⁰rāstbāz kā muṅh hikmat bayān kartā aur us kī zabān se insāf nikaltā hai.

³¹allāh kī sharīat us ke dil meṅ hai, aur us ke qadam kabhī nahīṅ ḍagmagāeṅge.

³²bedīn rāstbāz kī tāk meṅ baiṭh kar use mār ḍālne kā mauqā ḍhūṅḍtā hai.

³³lekin rab rāstbāz ko us ke hāth meṅ nahīṅ chhoṛegā, wuh use adālat meṅ mujrim nahīṅ ṭhaharne degā.

³⁴rab ke intizār meṅ rah aur us kī rāh par chaltā rah. tab wuh tujhe sarfarāz karke mulk kā wāris banāegā, aur tū bedīnoṅ kī halākat dekhegā.

³⁵maiṅ ne ek bedīn aur zālim ādmī ko dekhā jo phalte phūlte deodār ke daraḳht kī tarah āsmān se bāteṅ karne lagā.

³⁶lekin thoṛī der ke bād jab maiṅ dubārā wahāṅ se guzarā to wuh thā nahīṅ. maiṅ ne us kā khoj lagāyā, lekin kahīṅ na milā.

³⁷be'ilzām par dhyān de aur diyānatdār par ġhaur kar, kyūṅki āḳhirkār use amn aur sukūn hāsil hogā.

³⁸lekin mujrim mil kar tabāh ho jāeṅge, aur bedīnoṅ ko āḳhirkār rū-e-zamīn par se miṭāyā jāegā.

³⁹rāstbāzoṅ kī najāt rab kī taraf se hai, musībat ke waqt wuhī un kā qilā hai.

⁴⁰rab hī un kī madad karke unheṅ chhuṭkārā degā, wuhī unheṅ bedīnoṅ se bachā kar najāt degā. kyūṅki unhoṅ ne us meṅ panāh lī hai.