Read Roman Urdu Geo zabūr 38 Bible Online

zabūr 38 - Roman Urdu Geo bible

zabūr 38

¹dāūd kā zabūr. yāddāsht ke lie. ai rab, apne ġhazab meṅ mujhe sazā na de, qahr meṅ mujhe tambīh na kar!

²kyūṅki tere tīr mere jism meṅ lag gae haiṅ, terā hāth mujh par bhārī hai.

³terī lānat ke bāis merā pūrā jism bīmār hai, mere gunāh ke bāis merī tamām haḍḍiyāṅ galne lagī haiṅ.

⁴kyūṅki maiṅ apne gunāhoṅ ke sailāb meṅ ḍūb gayā hūṅ, wuh nāqābil-e-bardāsht bojh ban gae haiṅ.

⁵merī hamāqat ke bāis mere zaḳhmoṅ se badbū āne lagī, wuh galne lage haiṅ.

⁶maiṅ kubaṛā ban kar ḳhāk meṅ dab gayā hūṅ, pūrā din mātamī libās pahne phirtā hūṅ.

⁷merī kamr meṅ shadīd sozish hai, pūrā jism bīmār hai.

⁸maiṅ niḍhāl aur pāsh pāsh ho gayā hūṅ. dil ke azāb ke bāis maiṅ chīḳhtā chillātā hūṅ.

⁹ai rab, merī tamām ārzū tere sāmne hai, merī āheṅ tujh se poshīdā nahīṅ rahtīṅ.

¹⁰merā dil zor se dhaṛaktā, merī tāqat jawāb de gaī balki merī āṅkhoṅ kī raushnī bhī jātī rahī hai.

¹¹mere dost aur sāthī merī musībat dekh kar mujh se gurez karte, mere qarīb ke rishtedār dūr khaṛe rahte haiṅ.

¹²mere jānī dushman phande bichhā rahe haiṅ, jo mujhe nuqsān pahuṅchānā chāhte haiṅ wuh dhamkiyāṅ de rahe aur sārā sārā din farebdih mansūbe bāndh rahe haiṅ.

¹³aur maiṅ? maiṅ to goyā bahrā hūṅ, maiṅ nahīṅ suntā. maiṅ gūṅge kī mānind hūṅ jo apnā muṅh nahīṅ kholtā.

¹⁴maiṅ aisā shaḳhs ban gayā hūṅ jo na suntā, na jawāb meṅ etirāz kartā hai.

¹⁵kyūṅki ai rab, maiṅ tere intizār meṅ hūṅ. ai rab mere ḳhudā, tū hī merī sunegā.

¹⁶maiṅ bolā, “aisā na ho ki wuh merā nuqsān dekh kar baġhleṅ bajāeṅ, wuh mere pāoṅ ke ḍagmagāne par mujhe dabā kar apne āp par faḳhr kareṅ.”

¹⁷kyūṅki maiṅ laṛkhaṛāne ko hūṅ, merī aziyat mutawātir mere sāmne rahtī hai.

¹⁸chunāṅche maiṅ apnā qusūr taslīm kartā hūṅ, maiṅ apne gunāh ke bāis ġhamgīn hūṅ.

¹⁹mere dushman zindā aur tāqatwar haiṅ, aur jo bilāwajah mujh se nafrat karte haiṅ wuh bahut haiṅ.

²⁰wuh nekī ke badle badī karte haiṅ. wuh is lie mere dushman haiṅ ki maiṅ bhalāī ke pīchhe lagā rahtā hūṅ.

²¹ai rab, mujhe tark na kar! ai allāh, mujh se dūr na rah!

²²ai rab merī najāt, merī madad karne meṅ jaldī kar!