Read Roman Urdu Geo zabūr 39 Bible Online

zabūr 39 - Roman Urdu Geo bible

zabūr 39

¹dāūd kā zabūr. yadūtūn ke lie. mausīqī ke rāhnumā ke lie. maiṅ bolā, “maiṅ apnī rāhoṅ par dhyān dūṅgā tāki apnī zabān se gunāh na karūṅ. jab tak bedīn mere sāmne rahe us waqt tak apne muṅh ko lagām die rahūṅgā.”

²maiṅ chup-chāp ho gayā aur achchhī chīzoṅ se dūr rah kar ḳhāmosh rahā. tab merī aziyat baṛh gaī.

³merā dil pareshānī se tapne lagā, mere karāhte karāhte mere andar bechainī kī āg sī bhaṛak uṭhī. tab bāt zabān par ā gaī,

⁴“ai rab, mujhe merā anjām aur merī umr kī had dikhā tāki maiṅ jān lūṅ ki kitnā fānī hūṅ.

⁵dekh, merī zindagī kā daurāniyā tere sāmne lamhā bhar kā hai. merī pūrī umr tere nazdīk kuchh bhī nahīṅ hai. har insān dam bhar kā hī hai, ḳhwāh wuh kitnī hī mazbūtī se khaṛā kyūṅ na ho. (silāh)

⁶jab wuh idhar udhar ghūme phire to sāyā hī hai. us kā shor-sharābā bātil hai, aur go wuh daulat jamā karne meṅ masrūf rahe to bhī use mālūm nahīṅ ki bād meṅ kis ke qabze meṅ āegī.”

⁷chunāṅche ai rab, maiṅ kis ke intizār meṅ rahūṅ? tū hī merī wāhid ummīd hai!

⁸mere tamām gunāhoṅ se mujhe chhuṭkārā de. ahmaq ko merī ruswāī karne na de.

⁹maiṅ ḳhāmosh ho gayā hūṅ aur kabhī apnā muṅh nahīṅ kholtā, kyūṅki yih sab kuchh tere hī hāth se huā hai.

¹⁰apnā azāb mujh se dūr kar! tere hāth kī zarboṅ se maiṅ halāk ho rahā hūṅ.

¹¹jab tū insān ko us ke qusūr kī munāsib sazā de kar us ko tambīh kartā hai to us kī ḳhūbsūratī kīṛā lage kapṛe kī tarah jātī rahtī hai. har insān dam bhar kā hī hai. (silāh)

¹²ai rab, merī duā sun aur madad ke lie merī āhoṅ par tawajjuh de. mere āṅsū'oṅ ko dekh kar ḳhāmosh na rah. kyūṅki maiṅ tere huzūr rahne wālā pardesī, apne tamām bāpdādā kī tarah tere huzūr basne wālā ġhairshahrī hūṅ.

¹³mujh se bāz ā tāki maiṅ kūch karke nest ho jāne se pahle ek bār phir hashshāsh-bashshāsh ho jāūṅ.