Read Roman Urdu Geo zabūr 41 Bible Online

zabūr 41 - Roman Urdu Geo bible

zabūr 41

¹dāūd kā zabūr. mausīqī ke rāhnumā ke lie. mubārak hai wuh jo pasthāl kā ḳhayāl rakhtā hai. musībat ke din rab use chhuṭkārā degā.

²rab us kī hifāzat karke us kī zindagī ko mahfūz rakhegā, wuh mulk meṅ use barkat de kar use us ke dushmanoṅ ke lālach ke hawāle nahīṅ karegā.

³bīmārī ke waqt rab us ko bistar par saṅbhālegā. tū us kī sehhat pūrī tarah bahāl karegā.

⁴maiṅ bolā, “ai rab, mujh par rahm kar! mujhe shifā de, kyūṅki maiṅ ne terā hī gunāh kiyā hai.”

⁵mere dushman mere bāre meṅ ġhalat bāteṅ karke kahte haiṅ, “wuh kab maregā? us kā nām-o-nishān kab miṭegā?”

⁶jab kabhī koī mujh se milne āe to us kā dil jhūṭ boltā hai. pas-e-pardā wuh aisī nuqsāndeh mālūmāt jamā kartā hai jinheṅ bād meṅ bāhar jā kar galiyoṅ meṅ phailā sake.

⁷mujh se nafrat karne wāle sab āpas meṅ mere ḳhilāf phusphusāte haiṅ. wuh mere ḳhilāf bure mansūbe bāndh kar kahte haiṅ,

⁸“use mohlak marz lag gayā hai. wuh kabhī apne bistar par se dubārā nahīṅ uṭhegā.”

⁹merā dost bhī mere ḳhilāf uṭh khaṛā huā hai. jis par maiṅ etimād kartā thā aur jo merī roṭī khātā thā, us ne mujh par lāt uṭhāī hai.

¹⁰lekin tū ai rab, mujh par mehrbānī kar! mujhe dubārā uṭhā khaṛā kar tāki unheṅ un ke sulūk kā badlā de sakūṅ.

¹¹is se maiṅ jāntā hūṅ ki tū mujh se ḳhush hai ki merā dushman mujh par fath ke nāre nahīṅ lagātā.

¹²tū ne mujhe merī diyānatdārī ke bāis qāim rakhā aur hameshā ke lie apne huzūr khaṛā kiyā hai.

¹³rab kī hamd ho jo isrāīl kā ḳhudā hai. azal se abad tak us kī tamjīd ho. āmīn, phir āmīn.