Read Roman Urdu Geo zabūr 42 Bible Online

zabūr 42 - Roman Urdu Geo bible

zabūr 42

¹qorah kī aulād kā zabūr. hikmat kā gīt. mausīqī ke rāhnumā ke lie. ai allāh, jis tarah hirnī nadiyoṅ ke tāzā pānī ke lie taṛaptī hai usī tarah merī jān tere lie taṛaptī hai.

²merī jān ḳhudā, hāṅ zindā ḳhudā kī pyāsī hai. maiṅ kab jā kar allāh kā chehrā dekhūṅgā?

³din rāt mere āṅsū merī ġhizā rahe haiṅ. kyūṅki pūrā din mujh se kahā jātā hai, “terā ḳhudā kahāṅ hai?”

⁴pahle hālāt yād karke maiṅ apne sāmne apne dil kī āh-o-zārī unḍel detā hūṅ. [6] kitnā mazā ātā thā jab hamārā julūs nikaltā thā, jab maiṅ hujūm ke bīch meṅ ḳhushī aur shukrguzārī ke nāre lagāte hue allāh kī sukūnatgāh kī jānib baṛhtā jātā thā. kitnā shor mach jātā thā jab ham jashn manāte hue ghūmte phirte the.

⁵ai merī jān, tū ġham kyūṅ khā rahī hai, bechainī se kyūṅ taṛap rahī hai? allāh ke intizār meṅ rah, kyūṅki maiṅ dubārā us kī satāish karūṅga jo merā ḳhudā hai aur mere deḳhte deḳhte mujhe najāt detā hai.

⁶merī jān ġham ke māre pighal rahī hai. is lie maiṅ tujhe yardan ke mulk, harmūn ke pahāṛī silsile aur koh-e-mis'ār se yād kartā hūṅ.

⁷jab se tere ābshāroṅ kī āwāz buland huī to ek sailāb dūsre ko pukārne lagā hai. terī tamām maujeṅ aur lahreṅ mujh par se guzar gaī haiṅ.

⁸din ke waqt rab apnī shafqat bhejegā, aur rāt ke waqt us kā gīt mere sāth hogā, maiṅ apnī hayāt ke ḳhudā se duā karūṅga.

⁹maiṅ allāh apnī chaṭān se kahūṅgā, “tū mujhe kyūṅ bhūl gayā hai? maiṅ apne dushman ke zulm ke bāis kyūṅ mātamī libās pahne phirūṅ?”

¹⁰mere dushmanoṅ kī lān-tān se merī haḍḍiyāṅ ṭūṭ rahī haiṅ, kyūṅki pūrā din wuh kahte haiṅ, “terā ḳhudā kahāṅ hai?”

¹¹ai merī jān, tū ġham kyūṅ khā rahī hai, bechainī se kyūṅ taṛap rahī hai? allāh ke intizār meṅ rah, kyūṅki maiṅ dubārā us kī satāish karūṅga jo merā ḳhudā hai aur mere deḳhte deḳhte mujhe najāt detā hai.