Read Roman Urdu Geo zabūr 44 Bible Online

zabūr 44 - Roman Urdu Geo bible

zabūr 44

¹qorah kī aulād kā zabūr. hikmat kā gīt. mausīqī ke rāhnumā ke lie. ai allāh, jo kuchh tū ne hamāre bāpdādā ke ayyām meṅ yānī qadīm zamāne meṅ kiyā wuh ham ne apne kānoṅ se un se sunā hai.

²tū ne ḳhud apne hāth se dīgar qaumoṅ ko nikāl kar hamāre bāpdādā ko mulk meṅ paude kī tarah lagā diyā. tū ne ḳhud dīgar ummatoṅ ko shikast de kar hamāre bāpdādā ko mulk meṅ phalne phūlne diyā.

³unhoṅ ne apnī hī talwār ke zarī'e mulk par qabzā nahīṅ kiyā, apne hī bāzū se fath nahīṅ pāī balki tere dahne hāth, tere bāzū aur tere chehre ke nūr ne yih sab kuchh kiyā. kyūṅki wuh tujhe pasand the.

⁴tū merā bādshāh, merā ḳhudā hai. tere hī hukm par yāqūb ko madad hāsil hotī hai.

⁵terī madad se ham apne dushmanoṅ ko zamīn par paṭaḳh dete, terā nām le kar apne muḳhālifoṅ ko kuchal dete haiṅ.

⁶kyūṅki maiṅ apnī kamān par etimād nahīṅ kartā, aur merī talwār mujhe nahīṅ bachāegī

⁷balki tū hī hameṅ dushman se bachātā, tū hī unheṅ sharmindā hone detā hai jo ham se nafrat karte haiṅ.

⁸pūrā din ham allāh par faḳhr karte haiṅ, aur ham hameshā tak tere nām kī tamjīd kareṅge. (silāh)

⁹lekin ab tū ne hameṅ radd kar diyā, hameṅ sharmindā hone diyā hai. jab hamārī faujeṅ laṛne ke lie nikaltī haiṅ to tū un kā sāth nahīṅ detā.

¹⁰tū ne hameṅ dushman ke sāmne paspā hone diyā, aur jo ham se nafrat karte haiṅ unhoṅ ne hameṅ lūṭ liyā hai.

¹¹tū ne hameṅ bheṛ-bakriyoṅ kī tarah qassāb ke hāth meṅ chhoṛ diyā, hameṅ muḳhtalif qaumoṅ meṅ muntashir kar diyā hai.

¹²tū ne apnī qaum ko ḳhafīf sī raqm ke lie bech ḍālā, use faroḳht karne se nafā hāsil na huā.

¹³yih terī taraf se huā ki hamāre paṛosī hameṅ ruswā karte, gird-o-nawāh ke log hameṅ lān-tān karte haiṅ.

¹⁴ham aqwām meṅ ibratangez misāl ban gae haiṅ. log hameṅ dekh kar taubā taubā kahte haiṅ.

¹⁵din bhar merī ruswāī merī āṅkhoṅ ke sāmne rahtī hai. merā chehrā sharmsār hī rahtā hai,

¹⁶kyūṅki mujhe un kī gāliyāṅ aur kufr sunanā paṛtā hai, dushman aur intiqām lene par tule hue ko bardāsht karnā paṛtā hai.

¹⁷yih sab kuchh ham par ā gayā hai, hālāṅki na ham tujhe bhūl gae aur na tere ahd se bewafā hue haiṅ.

¹⁸na hamārā dil bāġhī ho gayā, na hamāre qadam terī rāh se bhaṭak gae haiṅ.

¹⁹tāham tū ne hameṅ chūr chūr karke gīdaṛoṅ ke darmiyān chhoṛ diyā, tū ne hameṅ gahrī tārīkī meṅ ḍūbne diyā hai.

²⁰agar ham apne ḳhudā kā nām bhūl kar apne hāth kisī aur mābūd kī taraf uṭhāte

²¹to kyā allāh ko yih bāt mālūm na ho jātī? zarūr! wuh to dil ke rāzoṅ se wāqif hotā hai.

²²lekin terī ḳhātir hameṅ din bhar maut kā sāmnā karnā paṛtā hai, log hameṅ zabah hone wālī bheṛoṅ ke barābar samajhte haiṅ.

²³ai rab, jāg uṭh. tū kyūṅ soyā huā hai? hameṅ hameshā ke lie radd na kar balki hamārī madad karne ke lie khaṛā ho jā.

²⁴tū apnā chehrā ham se poshīdā kyūṅ rakhtā hai, hamārī musībat aur ham par hone wāle zulm ko nazarandāz kyūṅ kartā hai?

²⁵hamārī jān ḳhāk meṅ dab gaī, hamārā badan miṭṭī se chimaṭ gayā hai.

²⁶uṭh kar hamārī madad kar! apnī shafqat kī ḳhātir fidyā de kar hameṅ chhuṛā!