Read Roman Urdu Geo zabūr 48 Bible Online

zabūr 48 - Roman Urdu Geo bible

zabūr 48

¹gīt. qorah kī aulād kā zabūr. rab azīm aur baṛī tārīf ke lāiq hai. us kā muqaddas pahāṛ hamāre ḳhudā ke shahr meṅ hai.

²koh-e-siyyūn kī bulandī ḳhūbsūrat hai, pūrī duniyā us se ḳhush hotī hai. koh-e-siyyūn dūrtarīn shimāl kā ilāhī pahāṛ hī hai, wuh azīm bādshāh kā shahr hai.

³allāh us ke mahaloṅ meṅ hai, wuh us kī panāhgāh sābit huā hai.

⁴kyūṅki dekho, bādshāh jamā ho kar yarūshalam se laṛne āe.

⁵lekin use deḳhte hī wuh hairān hue, wuh dahshat khā kar bhāg gae.

⁶wahāṅ un par kapkapī tārī huī, aur wuh dard-e-zah meṅ mubtalā aurat kī tarah pech-o-tāb khāne lage.

⁷jis tarah mashriqī āṅdhī tarsīs ke shāndār jahāzoṅ ko ṭukṛe ṭukṛe kar detī hai usī tarah tū ne unheṅ tabāh kar diyā.

⁸jo kuchh ham ne sunā hai wuh hamāre deḳhte deḳhte rabb-ul-afwāj hamāre ḳhudā ke shahr par sādiq āyā hai, allāh use abad tak qāim rakhegā. (silāh)

⁹ai allāh, ham ne terī sukūnatgāh meṅ terī shafqat par ġhaur-o-ḳhauz kiyā hai.

¹⁰ai allāh, terā nām is lāiq hai ki terī tārīf duniyā kī intihā tak kī jāe. terā dahnā hāth rāstī se bharā rahtā hai.

¹¹koh-e-siyyūn shādmān ho, yahūdāh kī beṭiyāṅ [7] tere munsifānā faisloṅ ke bāis ḳhushī manāeṅ.

¹²siyyūn ke irdgird ghūmo phiro, us kī fasīl ke sāth sāth chal kar us ke burj gin lo.

¹³us kī qilābandī par ḳhūb dhyān do, us ke mahaloṅ kā muāinā karo tāki āne wālī nasl ko sab kuchh sunā sako.

¹⁴yaqīnan allāh hamārā ḳhudā hameshā tak aisā hī hai. wuh abad tak hamārī rāhnumāī karegā.