Read Roman Urdu Geo zabūr 49 Bible Online

zabūr 49 - Roman Urdu Geo bible

zabūr 49

¹qorah kī aulād kā zabūr. mausīqī ke rāhnumā ke lie. ai tamām qaumo, suno! duniyā ke tamām bāshindo, dhyān do!

²chhoṭe aur baṛe, amīr aur ġharīb sab tawajjuh deṅ.

³merā muṅh hikmat bayān karegā aur mere dil kā ġhaur-o-ḳhauz samajh atā karegā.

⁴maiṅ apnā kān ek kahāwat kī taraf jhukāūṅgā, sarod bajā kar apnī pahelī kā hal batāūṅgā.

⁵maiṅ ḳhauf kyūṅ khāūṅ jab musībat ke din āeṅ aur makkāroṅ kā burā kām mujhe gher le?

⁶aise log apnī milkiyat par etimād aur apnī baṛī daulat par faḳhr karte haiṅ.

⁷koī bhī fidyā de kar apne bhāī kī jān ko nahīṅ chhuṛā saktā. wuh allāh ko is qism kā tāwān nahīṅ de saktā.

⁸kyūṅki itnī baṛī raqm denā us ke bas kī bāt nahīṅ. āḳhirkār use hameshā ke lie aisī koshishoṅ se bāz ānā paṛegā.

⁹chunāṅche koī bhī hameshā ke lie zindā nahīṅ rah saktā, āḳhirkār har ek maut ke gaṛhe meṅ utregā.

¹⁰kyūṅki har ek dekh saktā hai ki dānishmand bhī wafāt pāte aur ahmaq aur nāsamajh bhī mil kar halāk ho jāte haiṅ. sab ko apnī daulat dūsroṅ ke lie chhoṛnī paṛtī hai.

¹¹un kī qabreṅ abad tak un ke ghar banī raheṅgī, pusht-dar-pusht wuh un meṅ base raheṅge, go unheṅ zamīneṅ hāsil thīṅ jo un ke nām par thīṅ.

¹²insān apnī shān-o-shaukat ke bāwujūd qāim nahīṅ rahtā, use jānwaroṅ kī tarah halāk honā hai.

¹³yih un sab kī taqdīr hai jo apne āp par etimād rakhte haiṅ, aur un sab kā anjām jo un kī bāteṅ pasand karte haiṅ. (silāh)

¹⁴unheṅ bheṛ-bakriyoṅ kī tarah pātāl meṅ lāyā jāegā, aur maut unheṅ charāegī. kyūṅki subh ke waqt diyānatdār un par hukūmat kareṅge. tab un kī shakl-o-sūrat ghise phaṭe kapṛe kī tarah gal saṛ jāegī, pātāl hī un kī rihāishgāh hogā.

¹⁵lekin allāh merī jān kā fidyā degā, wuh mujhe pakaṛ kar pātāl kī girift se chhuṛāegā. (silāh)

¹⁶mat ghabrā jab koī amīr ho jāe, jab us ke ghar kī shān-o-shaukat baṛhtī jāe.

¹⁷marte waqt to wuh apne sāth kuchh nahīṅ le jāegā, us kī shān-o-shaukat us ke sāth pātāl meṅ nahīṅ utregī.

¹⁸beshak wuh jīte jī apne āp ko mubārak kahegā, aur dūsre bhī khāte-pīte ādmī kī tārīf kareṅge.

¹⁹phir bhī wuh āḳhirkār apne bāpdādā kī nasl ke pās utregā, un ke pās jo dubārā kabhī raushnī nahīṅ dekheṅge.

²⁰jo insān apnī shān-o-shaukat ke bāwujūd nāsamajh hai, use jānwaroṅ kī tarah halāk honā hai.