Read Roman Urdu Geo zabūr 50 Bible Online

zabūr 50 - Roman Urdu Geo bible

zabūr 50

¹āsaf kā zabūr. rab qādir-e-mutlaq ḳhudā bol uṭhā hai, us ne tulū-e-subh se le kar ġhurūb-e-āftāb tak pūrī duniyā ko bulāyā hai.

²allāh kā nūr siyyūn se chamak uṭhā hai, us pahāṛ se jo kāmil husn kā izhār hai.

³hamārā ḳhudā ā rahā hai, wuh ḳhāmosh nahīṅ rahegā. us ke āge āge sab kuchh bhasm ho rahā hai, us ke irdgird tez āṅdhī chal rahī hai.

⁴wuh āsmān-o-zamīn ko āwāz detā hai, “ab maiṅ apnī qaum kī adālat karūṅga.

⁵mere īmāndāroṅ ko mere huzūr jamā karo, unheṅ jinhoṅ ne qurbāniyāṅ pesh karke mere sāth ahd bāndhā hai.”

⁶āsmān us kī rāstī kā elān kareṅge, kyūṅki allāh ḳhud insāf karne wālā hai. (silāh)

⁷“ai merī qaum, sun! mujhe bāt karne de. ai isrāīl, maiṅ tere ḳhilāf gawāhī dūṅgā. maiṅ allāh terā ḳhudā hūṅ.

⁸maiṅ tujhe terī zabah kī qurbāniyoṅ ke bāis malāmat nahīṅ kar rahā. terī bhasm hone wālī qurbāniyāṅ to musalsal mere sāmne haiṅ.

⁹na maiṅ tere ghar se bail lūṅgā, na tere bāṛoṅ se bakre.

¹⁰kyūṅki jangal ke tamām jāndār mere hī haiṅ, hazāroṅ pahāṛiyoṅ par basne wāle jānwar mere hī haiṅ.

¹¹maiṅ pahāṛoṅ ke har parinde ko jāntā hūṅ, aur jo bhī maidānoṅ meṅ harkat kartā hai wuh merā hai.

¹²agar mujhe bhūk lagtī to maiṅ tujhe na batātā, kyūṅki zamīn aur jo kuchh us par hai merā hai.

¹³kyā tū samajhtā hai ki maiṅ sānḍoṅ kā gosht khānā yā bakroṅ kā ḳhūn pīnā chāhtā hūṅ?

¹⁴allāh ko shukrguzārī kī qurbānī pesh kar, aur wuh mannat pūrī kar jo tū ne allāh t'ālā ke huzūr mānī hai.

¹⁵musībat ke din mujhe pukār. tab maiṅ tujhe najāt dūṅgā aur tū merī tamjīd karegā.”

¹⁶lekin bedīn se allāh farmātā hai, “mere ahkām sunāne aur mere ahd kā zikr karne kā terā kyā haq hai?

¹⁷tū to tarbiyat se nafrat kartā aur mere farmān kachre kī tarah apne pīchhe phaiṅk detā hai.

¹⁸kisī chor ko deḳhte hī tū us kā sāth detā hai, tū zinākāroṅ se rifāqat rakhtā hai.

¹⁹tū apne muṅh ko bure kām ke lie istemāl kartā, apnī zabān ko dhokā dene ke lie tayyār rakhtā hai.

²⁰tū dūsroṅ ke pās baiṭh kar apne bhāī ke ḳhilāf boltā hai, apnī hī māṅ ke beṭe par tohmat lagātā hai.

²¹yih kuchh tū ne kiyā hai, aur maiṅ ḳhāmosh rahā. tab tū samjhā ki maiṅ bilkul tujh jaisā hūṅ. lekin maiṅ tujhe malāmat karūṅga, tere sāmne hī muāmalā tartīb se sunāūṅgā.

²²tum jo allāh ko bhūle hue ho, bāt samajh lo, warnā maiṅ tumheṅ phāṛ ḍālūṅgā. us waqt koī nahīṅ hogā jo tumheṅ bachāe.

²³jo shukrguzārī kī qurbānī pesh kare wuh merī tāzīm kartā hai. jo musammam irāde se aisī rāh par chale use maiṅ allāh kī najāt dikhāūṅgā.”