Read Roman Urdu Geo zabūr 51 Bible Online

zabūr 51 - Roman Urdu Geo bible

zabūr 51

¹dāūd kā zabūr. mausīqī ke rāhnumā ke lie. yih gīt us waqt se mutālliq hai jab dāūd ke bat-sabā ke sāth zinā karne ke bād nātan nabī us ke pās āyā. ai allāh, apnī shafqat ke mutābiq mujh par mehrbānī kar, apne baṛe rahm ke mutābiq merī sarkashī ke dāġh miṭā de.

²mujhe dho de tāki merā qusūr dūr ho jāe, jo gunāh mujh se sarzad huā hai us se mujhe pāk kar.

³kyūṅki maiṅ apnī sarkashī ko māntā hūṅ, aur merā gunāh hameshā mere sāmne rahtā hai.

⁴maiṅ ne tere, sirf tere hī ḳhilāf gunāh kiyā, maiṅ ne wuh kuchh kiyā jo terī nazar meṅ burā hai. kyūṅki lāzim hai ki tū bolte waqt rāst ṭhahre aur adālat karte waqt pākīzā sābit ho jāe.

⁵yaqīnan maiṅ gunāhālūdā hālat meṅ paidā huā. jūṅ hī maiṅ māṅ ke peṭ meṅ wujūd meṅ āyā to gunāhgār thā.

⁶yaqīnan tū bātin kī sachchāī pasand kartā aur poshīdagī meṅ mujhe hikmat kī tālīm detā hai.

⁷zūfā le kar mujh se gunāh dūr kar tāki pāk-sāf ho jāūṅ. mujhe dho de tāki barf se zyādā safed ho jāūṅ.

⁸mujhe dubārā ḳhushī aur shādmānī sunane de tāki jin haḍḍiyoṅ ko tū ne kuchal diyā wuh shādiyānā bajāeṅ.

⁹apne chehre ko mere gunāhoṅ se pher le, merā tamām qusūr miṭā de.

¹⁰ai allāh, mere andar pāk dil paidā kar, mujh meṅ nae sire se sābitqadam rūh qāim kar.

¹¹mujhe apne huzūr se ḳhārij na kar, na apne muqaddas rūh ko mujh se dūr kar.

¹²mujhe dubārā apnī najāt kī ḳhushī dilā, mujhe musta'id rūh atā karke saṅbhāle rakh.

¹³tab maiṅ unheṅ terī rāhoṅ kī tālīm dūṅgā jo tujh se bewafā ho gae haiṅ, aur gunāhgār tere pās wāpas āeṅge.

¹⁴ai allāh, merī najāt ke ḳhudā, qatl kā qusūr mujh se dūr karke mujhe bachā. tab merī zabān terī rāstī kī hamd-o-sanā karegī.

¹⁵ai rab, mere hoṅṭoṅ ko khol tāki merā muṅh terī satāish kare.

¹⁶kyūṅki tū zabah kī qurbānī nahīṅ chāhtā, warnā maiṅ wuh pesh kartā. bhasm hone wālī qurbāniyāṅ tujhe pasand nahīṅ.

¹⁷allāh ko manzūr qurbānī shikastā rūh hai. ai allāh, tū shikastā aur kuchle hue dil ko haqīr nahīṅ jānegā.

¹⁸apnī mehrbānī kā izhār karke siyyūn ko ḳhushhālī baḳhsh, yarūshalam kī fasīl tāmīr kar.

¹⁹tab tujhe hamārī sahīh qurbāniyāṅ, hamārī bhasm hone wālī aur mukammal qurbāniyāṅ pasand āeṅgī. tab terī qurbāngāh par bail chaṛhāe jāeṅge.