Read Roman Urdu Geo zabūr 52 Bible Online

zabūr 52 - Roman Urdu Geo bible

zabūr 52

¹dāūd kā zabūr. mausīqī ke rāhnumā ke lie. hikmat kā yih gīt us waqt se mutālliq hai jab doeg adomī sāūl bādshāh ke pās gayā aur use batāyā, “dāūd aḳhīmalik imām ke ghar meṅ gayā hai.” ai sūrme, tū apnī badī par kyūṅ faḳhr kartā hai? allāh kī shafqat din bhar qāim rahtī hai.

²ai dhokebāz, terī zabān tez ustre kī tarah chaltī huī tabāhī ke mansūbe bāndhtī hai.

³tujhe bhalāī kī nisbat burāī zyādā pyārī hai, sach bolne kī nisbat jhūṭ zyādā pasand hai. (silāh)

⁴ai farebdih zabān, tū har tabāhkun bāt se pyār kartī hai.

⁵lekin allāh tujhe hameshā ke lie ḳhāk meṅ milāegā. wuh tujhe mār mār kar tere ḳhaime se nikāl degā, tujhe jaṛ se ukhāṛ kar zindoṅ ke mulk se ḳhārij kar degā. (silāh)

⁶rāstbāz yih dekh kar ḳhauf khāeṅge. wuh us par haṅs kar kaheṅge,

⁷“lo, yih wuh ādmī hai jis ne allāh meṅ panāh na lī balki apnī baṛī daulat par etimād kiyā, jo apne tabāhkun mansūboṅ se tāqatwar ho gayā thā.”

⁸lekin maiṅ allāh ke ghar meṅ zaitūn ke phalte phūlte daraḳht kī mānind hūṅ. maiṅ hameshā ke lie allāh kī shafqat par bharosā rakhūṅgā.

⁹maiṅ abad tak us ke lie terī satāish karūṅga jo tū ne kiyā hai. maiṅ tere īmāndāroṅ ke sāmne hī tere nām ke intizār meṅ rahūṅgā, kyūṅki wuh bhalā hai.