Read Roman Urdu Geo zabūr 55 Bible Online

zabūr 55 - Roman Urdu Geo bible

zabūr 55

¹dāūd kā zabūr. mausīqī ke rāhnumā ke lie. hikmat kā yih gīt tārdār sāzoṅ ke sāth gānā hai. ai allāh, merī duā par dhyān de, apne āp ko merī iltijā se chhupāe na rakh.

²mujh par ġhaur kar, merī sun. maiṅ bechainī se idhar udhar ghūmte hue āheṅ bhar rahā hūṅ.

³kyūṅki dushman shor machā rahā, bedīn mujhe tang kar rahā hai. wuh mujh par āfat lāne par tule hue haiṅ, ġhusse meṅ merī muḳhālafat kar rahe haiṅ.

⁴merā dil mere andar taṛap rahā hai, maut kī dahshat mujh par chhā gaī hai.

⁵ḳhauf aur larzish mujh par tārī huī, haibat mujh par ġhālib ā gaī hai.

⁶maiṅ bolā, “kāsh mere kabūtar ke se par hoṅ tāki uṛ kar ārām-o-sukūn pā sakūṅ!

⁷tab maiṅ dūr tak bhāg kar registān meṅ baserā kartā,

⁸maiṅ jaldī se kahīṅ panāh letā jahāṅ tez āṅdhī aur tūfān se mahfūz rahtā.” (silāh)

⁹ai rab, un meṅ abtarī paidā kar, un kī zabān meṅ iḳhtilāf ḍāl! kyūṅki mujhe shahr meṅ har taraf zulm aur jhagaṛe nazar āte haiṅ.

¹⁰din rāt wuh fasīl par chakkar kāṭte haiṅ, aur shahr fasād aur ḳharābī se bharā rahtā hai.

¹¹us ke bīch meṅ tabāhī kī hukūmat hai, aur zulm aur fareb us ke chauk ko nahīṅ chhoṛte.

¹²agar koī dushman merī ruswāī kartā to qābil-e-bardāsht hotā. agar mujh se nafrat karne wālā mujhe dabā kar apne āp ko sarfarāz kartā to maiṅ us se chhup jātā.

¹³lekin tū hī ne yih kiyā, tū jo mujh jaisā hai, jo merā qarībī dost aur hamrāz hai.

¹⁴merī tere sāth kitnī achchhī rifāqat thī jab ham hujūm ke sāth allāh ke ghar kī taraf chalte gae.

¹⁵maut achānak hī unheṅ apnī girift meṅ le le. zindā hī wuh pātāl meṅ utar jāeṅ, kyūṅki burāī ne un meṅ apnā ghar banā liyā hai.

¹⁶lekin maiṅ pukār kar allāh se madad māṅgtā hūṅ, aur rab mujhe najāt degā.

¹⁷maiṅ har waqt āh-o-zārī kartā aur karāhtā rahtā hūṅ, ḳhwāh subh ho, ḳhwāh dopahar yā shām. aur wuh merī sunegā.

¹⁸wuh fidyā de kar merī jān ko un se chhuṛāegā jo mere ḳhilāf laṛ rahe haiṅ. go un kī tādād baṛī hai wuh mujhe ārām-o-sukūn degā.

¹⁹allāh jo azal se taḳhtnashīn hai merī sun kar unheṅ munāsib jawāb degā. (silāh) kyūṅki na wuh tabdīl ho jāeṅge, na kabhī allāh kā ḳhauf māneṅge.

²⁰us shaḳhs ne apnā hāth apne dostoṅ ke ḳhilāf uṭhāyā, us ne apnā ahd toṛ liyā hai.

²¹us kī zabān par makkhan kī sī chiknī-chupṛī bāteṅ aur dil meṅ jang hai. us ke tel se zyādā narm alfāz haqīqat meṅ khaiṅchī huī talwāreṅ haiṅ.

²²apnā bojh rab par ḍāl to wuh tujhe saṅbhālegā. wuh rāstbāz ko kabhī ḍagmagāne nahīṅ degā.

²³lekin ai allāh, tū unheṅ tabāhī ke gaṛhe meṅ utarne degā. ḳhūṅḳhār aur dhokebāz ādhī umr bhī nahīṅ pāeṅge balki jaldī mareṅge. lekin maiṅ tujh par bharosā rakhtā hūṅ.