Read Roman Urdu Geo zabūr 56 Bible Online

zabūr 56 - Roman Urdu Geo bible

zabūr 56

¹dāūd kā zabūr. mausīqī ke rāhnumā ke lie. tarz: dūrdarāz jazīroṅ kā kabūtar. yih sunahrā gīt us waqt se mutālliq hai jab filistiyoṅ ne use jāt meṅ pakaṛ liyā. ai allāh, mujh par mehrbānī kar! kyūṅki log mujhe tang kar rahe haiṅ, laṛne wālā din bhar mujhe satā rahā hai.

²din bhar mere dushman mere pīchhe lage haiṅ, kyūṅki wuh bahut haiṅ aur ġhurūr se mujh se laṛ rahe haiṅ.

³lekin jab ḳhauf mujhe apnī girift meṅ le le to maiṅ tujh par hī bharosā rakhtā hūṅ.

⁴allāh ke kalām par merā faḳhr hai, allāh par merā bharosā hai. maiṅ ḍarūṅga nahīṅ, kyūṅki fānī insān mujhe kyā nuqsān pahuṅchā saktā hai?

⁵din bhar wuh mere alfāz ko toṛ-maroṛ kar ġhalat mānī nikālte, apne tamām mansūboṅ se mujhe zarar pahuṅchānā chāhte haiṅ.

⁶wuh hamlā-āwar ho kar tāk meṅ baiṭh jāte aur mere har qadam par ġhaur karte haiṅ. kyūṅki wuh mujhe mār ḍālne par tule hue haiṅ.

⁷jo aisī sharīr harkateṅ karte haiṅ, kyā unheṅ bachnā chāhie? hargiz nahīṅ! ai allāh, aqwām ko ġhusse meṅ ḳhāk meṅ milā de.

⁸jitne bhī din maiṅ beghar phirā hūṅ un kā tū ne pūrā hisāb rakhā hai. ai allāh, mere āṅsū apne mashkīze meṅ ḍāl le! kyā wuh pahle se terī kitāb meṅ qalamband nahīṅ haiṅ? zarūr!

⁹phir jab maiṅ tujhe pukārūṅga to mere dushman mujh se bāz āeṅge. yih maiṅ ne jān liyā hai ki allāh mere sāth hai!

¹⁰allāh ke kalām par merā faḳhr hai, rab ke kalām par merā faḳhr hai.

¹¹allāh par merā bharosā hai. maiṅ ḍarūṅga nahīṅ, kyūṅki fānī insān mujhe kyā nuqsān pahuṅchā saktā hai?

¹²ai allāh, tere huzūr maiṅ ne mannateṅ mānī haiṅ, aur ab maiṅ tujhe shukrguzārī kī qurbāniyāṅ pesh karūṅga.

¹³kyūṅki tū ne merī jān ko maut se bachāyā aur mere pāoṅ ko ṭhokar khāne se mahfūz rakhā tāki zindagī kī raushnī meṅ allāh ke huzūr chalūṅ.