Read Roman Urdu Geo zabūr 59 Bible Online

zabūr 59 - Roman Urdu Geo bible

zabūr 59

¹dāūd kā zabūr. mausīqī ke rāhnumā ke lie. tarz: tabāh na kar. yih sunahrā gīt us waqt se mutālliq hai jab sāūl ne apne ādmiyoṅ ko dāūd ke ghar kī pahrādārī karne ke lie bhejā tāki jab mauqā mile use qatl kareṅ. ai mere ḳhudā, mujhe mere dushmanoṅ se bachā. un se merī hifāzat kar jo mere ḳhilāf uṭhe haiṅ.

²mujhe badkāroṅ se chhuṭkārā de, ḳhūṅḳhwāroṅ se rihā kar.

³dekh, wuh merī tāk meṅ baiṭhe haiṅ. ai rab, zabardast ādmī mujh par hamlā-āwar haiṅ, hālāṅki mujh se na ḳhatā huī na gunāh.

⁴maiṅ bequsūr hūṅ, tāham wuh dauṛ dauṛ kar mujh se laṛne kī tayyāriyāṅ kar rahe haiṅ. chunāṅche jāg uṭh, merī madad karne ā, jo kuchh ho rahā hai us par nazar ḍāl.

⁵ai rab, lashkaroṅ aur isrāīl ke ḳhudā, dīgar tamām qaumoṅ ko sazā dene ke lie jāg uṭh. un sab par karm na farmā jo sharīr aur ġhaddār haiṅ. (silāh)

⁶har shām ko wuh wāpas ā jāte aur kuttoṅ kī tarah bhaunkte hue shahr kī galiyoṅ meṅ ghūmte phirte haiṅ.

⁷dekh, un ke muṅh se rāl ṭapak rahī hai, un ke hoṅṭoṅ se talwāreṅ nikal rahī haiṅ. kyūṅki wuh samajhte haiṅ, “kaun sunegā?”

⁸lekin tū ai rab, un par haṅstā hai, tū tamām qaumoṅ kā mazāq uṛātā hai.

⁹ai merī quwwat, merī āṅkheṅ tujh par lagī raheṅgī, kyūṅki allāh merā qilā hai.

¹⁰merā ḳhudā apnī mehrbānī ke sāth mujh se milne āegā, allāh baḳhsh degā ki maiṅ apne dushmanoṅ kī shikast dekh kar ḳhush hūṅgā.

¹¹ai allāh hamārī ḍhāl, unheṅ halāk na kar, warnā merī qaum terā kām bhūl jāegī. apnī qudrat kā izhār yūṅ kar ki wuh idhar udhar laṛkhaṛā kar gir jāeṅ.

¹²jo kuchh bhī un ke muṅh se nikaltā hai wuh gunāh hai, wuh lānateṅ aur jhūṭ hī sunāte haiṅ. chunāṅche unheṅ un ke takabbur ke jāl meṅ phaṅsne de.

¹³ġhusse meṅ unheṅ tabāh kar! unheṅ yūṅ tabāh kar ki un kā nām-o-nishān tak na rahe. tab log duniyā kī intihā tak jān leṅge ki allāh yāqūb kī aulād par hukūmat kartā hai. (silāh)

¹⁴har shām ko wuh wāpas ā jāte aur kuttoṅ kī tarah bhaunkte hue shahr kī galiyoṅ meṅ ghūmte phirte haiṅ.

¹⁵wuh idhar udhar gasht lagā kar khāne kī chīzeṅ ḍhūṅḍte haiṅ. agar peṭ na bhare to ġhurrāte rahte haiṅ.

¹⁶lekin maiṅ terī qudrat kī madahsarāī karūṅga, subh ko ḳhushī ke nāre lagā kar terī shafqat kī satāish karūṅga. kyūṅki tū merā qilā aur musībat ke waqt merī panāhgāh hai.

¹⁷ai merī quwwat, maiṅ terī madahsarāī karūṅga, kyūṅki allāh merā qilā aur merā mehrbān ḳhudā hai.