Read Roman Urdu Geo zabūr 62 Bible Online

zabūr 62 - Roman Urdu Geo bible

zabūr 62

¹dāūd kā zabūr. mausīqī ke rāhnumā ke lie. yadūtūn ke lie. merī jān ḳhāmoshī se allāh hī ke intizār meṅ hai. usī se mujhe madad miltī hai.

²wuhī merī chaṭān, merī najāt aur merā qilā hai, is lie maiṅ zyādā nahīṅ ḍagmagāūṅgā.

³tum kab tak us par hamlā karoge jo pahle hī jhukī huī dīwār kī mānind hai? tum sab kab tak use qatl karne par tule rahoge jo pahle hī girne wālī chārdīwārī jaisā hai?

⁴un ke mansūboṅ kā ek hī maqsad hai, ki use us ke ūṅche uhde se utāreṅ. unheṅ jhūṭ se mazā ātā hai. muṅh se wuh barkat dete, lekin andar hī andar lānat karte haiṅ. (silāh)

⁵lekin tū ai merī jān, ḳhāmoshī se allāh hī ke intizār meṅ rah. kyūṅki usī se mujhe ummīd hai.

⁶sirf wuhī merī jān kī chaṭān, merī najāt aur merā qilā hai, is lie maiṅ nahīṅ ḍagmagāūṅgā.

⁷merī najāt aur izzat allāh par mabnī hai, wuhī merī mahfūz chaṭān hai. allāh meṅ maiṅ panāh letā hūṅ.

⁸ai ummat, har waqt us par bharosā rakh! us ke huzūr apne dil kā ranj-o-alam pānī kī tarah unḍel de. allāh hī hamārī panāhgāh hai. (silāh)

⁹insān dam bhar kā hī hai, aur baṛe log fareb hī haiṅ. agar unheṅ tarāzū meṅ tolā jāe to mil kar un kā wazn ek phūṅk se bhī kam hai.

¹⁰zulm par etimād na karo, chorī karne par fuzūl ummīd na rakho. aur agar daulat baṛh jāe to tumhārā dil us se lipaṭ na jāe.

¹¹allāh ne ek bāt farmāī balki do bār maiṅ ne sunī hai ki allāh hī qādir hai.

¹²ai rab, yaqīnan tū mehrbān hai, kyūṅki tū har ek ko us ke āmāl kā badlā detā hai.