Read Roman Urdu Geo zabūr 65 Bible Online

zabūr 65 - Roman Urdu Geo bible

zabūr 65

¹dāūd kā zabūr. mausīqī ke rāhnumā ke lie gīt. ai allāh, tū hī is lāiq hai ki insān koh-e-siyyūn par ḳhāmoshī se tere intizār meṅ rahe, terī tamjīd kare aur tere huzūr apnī mannateṅ pūrī kare.

²tū duāoṅ ko suntā hai, is lie tamām insān tere huzūr āte haiṅ.

³gunāh mujh par ġhālib ā gae haiṅ, tū hī hamārī sarkash harkatoṅ ko muāf kar.

⁴mubārak hai wuh jise tū chun kar qarīb āne detā hai, jo terī bārgāhoṅ meṅ bas saktā hai. baḳhsh de ki ham tere ghar, terī muqaddas sukūnatgāh kī achchhī chīzoṅ se ser ho jāeṅ.

⁵ai hamārī najāt ke ḳhudā, haibatnāk kāmoṅ se apnī rāstī qāim karke hamārī sun! kyūṅki tū zamīn kī tamām hudūd aur dūrdarāz samundaroṅ tak sab kī ummīd hai.

⁶tū apnī qudrat se pahāṛoṅ kī mazbūt bunyādeṅ ḍāltā aur quwwat se kamarbastā rahtā hai.

⁷tū mutalātim samundaroṅ ko thamā detā hai, tū un kī garajtī lahroṅ aur ummatoṅ kā shor-sharābā ḳhatm kar detā hai.

⁸duniyā kī intihā ke bāshinde tere nishānāt se ḳhauf khāte haiṅ, aur tū tulū-e-subh aur ġhurūb-e-āftāb ko ḳhushī manāne detā hai.

⁹tū zamīn kī dekh-bhāl karke use pānī kī kasrat aur zarḳhezī se nawāztā hai, chunāṅche allāh kī nadī pānī se bharī rahtī hai. zamīn ko yūṅ tayyār karke tū insān ko anāj kī achchhī fasal muhayyā kartā hai.

¹⁰tū khet kī reghāriyoṅ ko sharābor karke us ke ḍheloṅ ko hamwār kartā hai. tū bārish kī bauchhāṛoṅ se zamīn ko narm karke us kī fasloṅ ko barkat detā hai.

¹¹tū sāl ko apnī bhalāī kā tāj pahnā detā hai, aur tere naqsh-e-qadam tel kī farāwānī se ṭapakte haiṅ.

¹²bayābān kī charāgāheṅ tel [8] kī kasrat se ṭapaktī haiṅ, aur pahāṛiyāṅ bharpūr ḳhushī se mulabbas ho jātī haiṅ.

¹³sabzāzār bheṛ-bakriyoṅ se ārāstā haiṅ, wādiyāṅ anāj se ḍhakī huī haiṅ. sab ḳhushī ke nāre lagā rahe haiṅ, sab gīt gā rahe haiṅ!