Read Roman Urdu Geo zabūr 66 Bible Online

zabūr 66 - Roman Urdu Geo bible

zabūr 66

¹mausīqī ke rāhnumā ke lie. zabūr. gīt. ai sārī zamīn, ḳhushī ke nāre lagā kar allāh kī madahsarāī kar!

²us ke nām ke jalāl kī tamjīd karo, us kī satāish urūj tak le jāo!

³allāh se kaho, “tere kām kitne purjalāl haiṅ. terī baṛī qudrat ke sāmne tere dushman dabak kar terī ḳhushāmad karne lagte haiṅ.

⁴tamām duniyā tujhe sijdā kare! wuh terī tārīf meṅ gīt gāe, tere nām kī satāish kare.” (silāh)

⁵āo, allāh ke kām dekho! ādamzād kī ḳhātir us ne kitne purjalāl mojize kie haiṅ!

⁶us ne samundar ko ḳhushk zamīn meṅ badal diyā. jahāṅ pahle pānī kā tez bahāo thā wahāṅ se log paidal hī guzare. chunāṅche āo, ham us kī ḳhushī manāeṅ.

⁷apnī qudrat se wuh abad tak hukūmat kartā hai. us kī āṅkheṅ qaumoṅ par lagī rahtī haiṅ tāki sarkash us ke ḳhilāf na uṭheṅ. (silāh)

⁸ai ummato, hamāre ḳhudā kī hamd karo. us kī satāish dūr tak sunāī de.

⁹kyūṅki wuh hamārī zindagī qāim rakhtā, hamāre pāoṅ ko ḍagmagāne nahīṅ detā.

¹⁰kyūṅki ai allāh, tū ne hameṅ āzmāyā. jis tarah chāṅdī ko pighlā kar sāf kiyā jātā hai usī tarah tū ne hameṅ pāk-sāf kar diyā hai.

¹¹tū ne hameṅ jāl meṅ phaṅsā diyā, hamārī kamr par aziyatnāk bojh ḍāl diyā.

¹²tū ne logoṅ ke rathoṅ ko hamāre saroṅ par se guzarne diyā, aur ham āg aur pānī kī zad meṅ ā gae. lekin phir tū ne hameṅ musībat se nikāl kar farāwānī kī jagah pahuṅchāyā.

¹³maiṅ bhasm hone wālī qurbāniyāṅ le kar tere ghar meṅ āūṅgā aur tere huzūr apnī mannateṅ pūrī karūṅga,

¹⁴wuh mannateṅ jo mere muṅh ne musībat ke waqt mānī thīṅ.

¹⁵bhasm hone wālī qurbānī ke taur par maiṅ tujhe moṭī-tāzī bheṛeṅ aur menḍhoṅ kā dhuāṅ pesh karūṅga, sāth sāth bail aur bakre bhī chaṛhāūṅgā. (silāh)

¹⁶ai allāh kā ḳhauf mānane wālo, āo aur suno! jo kuchh allāh ne merī jān ke lie kiyā wuh tumheṅ sunāūṅgā.

¹⁷maiṅ ne apne muṅh se use pukārā, lekin merī zabān us kī tārīf karne ke lie tayyār thī.

¹⁸agar maiṅ dil meṅ gunāh kī parwarish kartā to rab merī na suntā.

¹⁹lekin yaqīnan rab ne merī sunī, us ne merī iltijā par tawajjuh dī.

²⁰allāh kī hamd ho, jis ne na merī duā radd kī, na apnī shafqat mujh se bāz rakhī.