Read Roman Urdu Geo zabūr 69 Bible Online

zabūr 69 - Roman Urdu Geo bible

zabūr 69

¹dāūd kā zabūr. tarz: sosan ke phūl. mausīqī ke rāhnumā ke lie. ai allāh, mujhe bachā! kyūṅki pānī mere gale tak pahuṅch gayā hai.

²maiṅ gahrī daldal meṅ dhaṅs gayā hūṅ, kahīṅ pāoṅ jamāne kī jagah nahīṅ miltī. maiṅ pānī kī gahrāiyoṅ meṅ ā gayā hūṅ, sailāb mujh par ġhālib ā gayā hai.

³maiṅ chillāte chillāte thak gayā hūṅ. merā galā baiṭh gayā hai. apne ḳhudā kā intizār karte karte merī āṅkheṅ dhundlā gaīṅ.

⁴jo bilāwajah mujh se kīnā rakhte haiṅ wuh mere sar ke bāloṅ se zyādā haiṅ, jo besabab mere dushman haiṅ aur mujhe tabāh karnā chāhte haiṅ wuh tāqatwar haiṅ. jo kuchh maiṅ ne nahīṅ lūṭā use mujh se talab kiyā jātā hai.

⁵ai allāh, tū merī hamāqat se wāqif hai, merā qusūr tujh se poshīdā nahīṅ hai.

⁶ai qādir-e-mutlaq rabb-ul-afwāj, jo tere intizār meṅ rahte haiṅ wuh mere bāis sharmindā na hoṅ. ai isrāīl ke ḳhudā, mere bāis tere tālib kī ruswāī na ho.

⁷kyūṅki terī ḳhātir maiṅ sharmindagī bardāsht kar rahā hūṅ, terī ḳhātir merā chehrā sharmsār hī rahtā hai.

⁸maiṅ apne sage bhāiyoṅ ke nazdīk ajnabī aur apnī māṅ ke beṭoṅ ke nazdīk pardesī ban gayā hūṅ.

⁹kyūṅki tere ghar kī ġhairat mujhe khā gaī hai, jo tujhe gāliyāṅ dete haiṅ un kī gāliyāṅ mujh par ā gaī haiṅ.

¹⁰jab maiṅ rozā rakh kar rotā thā to log merā mazāq uṛāte the.

¹¹jab mātamī libās pahne phirtā thā to un ke lie ibratangez misāl ban gayā.

¹²jo buzurg shahr ke darwāze par baiṭhe haiṅ wuh mere bāre meṅ gappeṅ hāṅkte haiṅ. sharābī mujhe apne tanz bhare gītoṅ kā nishānā banāte haiṅ.

¹³lekin ai rab, merī tujh se duā hai ki maiṅ tujhe dubārā manzūr ho jāūṅ. ai allāh, apnī azīm shafqat ke mutābiq merī sun, apnī yaqīnī najāt ke mutābiq mujhe bachā.

¹⁴mujhe daldal se nikāl tāki ġharq na ho jāūṅ. mujhe un se chhuṭkārā de jo mujh se nafrat karte haiṅ. pānī kī gahrāiyoṅ se mujhe bachā.

¹⁵sailāb mujh par ġhālib na āe, samundar kī gahrāī mujhe haṛap na kar le, gaṛhā mere ūpar apnā muṅh band na kar le.

¹⁶ai rab, merī sun, kyūṅki terī shafqat bhalī hai. apne azīm rahm ke mutābiq merī taraf rujū kar.

¹⁷apnā chehrā apne ḳhādim se chhupāe na rakh, kyūṅki maiṅ musībat meṅ hūṅ. jaldī se merī sun!

¹⁸qarīb ā kar merī jān kā fidyā de, mere dushmanoṅ ke sabab se iwazānā de kar mujhe chhuṛā.

¹⁹tū merī ruswāī, merī sharmindagī aur tazlīl se wāqif hai. terī āṅkheṅ mere tamām dushmanoṅ par lagī rahtī haiṅ.

²⁰un ke tānoṅ se merā dil ṭūṭ gayā hai, maiṅ bīmār paṛ gayā hūṅ. maiṅ hamdardī ke intizār meṅ rahā, lekin befāidā. maiṅ ne tawaqqo kī ki koī mujhe dilāsā de, lekin ek bhī na milā.

²¹unhoṅ ne merī ḳhurāk meṅ kaṛwā zahr milāyā, mujhe sirkā pilāyā jab pyāsā thā.

²²un kī mez un ke lie phandā aur un ke sāthiyoṅ ke lie jāl ban jāe.

²³un kī āṅkheṅ tārīk ho jāeṅ tāki wuh dekh na sakeṅ. un kī kamr hameshā tak ḍagmagātī rahe.

²⁴apnā pūrā ġhussā un par utār, terā saḳht ġhazab un par ā paṛe.

²⁵un kī rihāishgāh sunsān ho jāe aur koī un ke ḳhaimoṅ meṅ ābād na ho,

²⁶kyūṅki jise tū hī ne sazā dī use wuh satāte haiṅ, jise tū hī ne zaḳhmī kiyā us kā dukh dūsroṅ ko sunā kar ḳhush hote haiṅ.

²⁷un ke qusūr kā saḳhtī se hisāb-kitāb kar, wuh tere sāmne rāstbāz na ṭhahreṅ.

²⁸unheṅ kitāb-e-hayāt se miṭāyā jāe, un kā nām rāstbāzoṅ kī fahrist meṅ darj na ho.

²⁹hāy, maiṅ musībat meṅ phaṅsā huā hūṅ, mujhe bahut dard hai. ai allāh, terī najāt mujhe mahfūz rakhe.

³⁰maiṅ allāh ke nām kī madahsarāī karūṅga, shukrguzārī se us kī tāzīm karūṅga.

³¹yih rab ko bail yā sīṅg aur khur rakhne wāle sānḍ se kahīṅ zyādā pasand āegā.

³²halīm allāh kā kām dekh kar ḳhush ho jāeṅge. ai allāh ke tālibo, tasallī pāo!

³³kyūṅki rab muhtājoṅ kī suntā aur apne qaidiyoṅ ko haqīr nahīṅ jāntā.

³⁴āsmān-o-zamīn us kī tamjīd kareṅ, samundar aur jo kuchh us meṅ harkat kartā hai us kī satāish kare.

³⁵kyūṅki allāh siyyūn ko najāt de kar yahūdāh ke shahroṅ ko tāmīr karegā, aur us ke ḳhādim un par qabzā karke un meṅ ābād ho jāeṅge.

³⁶un kī aulād mulk ko mīrās meṅ pāegī, aur us ke nām se muhabbat rakhne wāle us meṅ base raheṅge.