Read Roman Urdu Geo zabūr 7 Bible Online

zabūr 7 - Roman Urdu Geo bible

zabūr 7

¹dāūd kā wuh mātamī gīt jo us ne kūsh binyamīnī kī bātoṅ par rab kī tamjīd meṅ gāyā. ai rab mere ḳhudā, maiṅ tujh meṅ panāh letā hūṅ. mujhe un sab se bachā kar chhuṭkārā de jo merā tāqqub kar rahe haiṅ,

²warnā wuh sherbabar kī tarah mujhe phāṛ kar ṭukṛe ṭukṛe kar deṅge, aur bachāne wālā koī nahīṅ hogā.

³ai rab mere ḳhudā, agar mujh se yih kuchh sarzad huā aur mere hāth qusūrwār hoṅ,

⁴agar maiṅ ne us se burā sulūk kiyā jis kā mere sāth jhagaṛā nahīṅ thā yā apne dushman ko ḳhwāh-ma-ḳhwāh lūṭ liyā ho

⁵to phir merā dushman mere pīchhe paṛ kar mujhe pakaṛ le. wuh merī jān ko miṭṭī meṅ kuchal de, merī izzat ko ḳhāk meṅ milāe. (silāh)

⁶ai rab, uṭh aur apnā ġhazab dikhā! mere dushmanoṅ ke taish ke ḳhilāf khaṛā ho jā. merī madad karne ke lie jāg uṭh. tū ne ḳhud adālat kā hukm diyā hai.

⁷aqwām tere irdgird jamā ho jāeṅ jab tū un ke ūpar bulandiyoṅ par taḳhtnashīn ho jāe.

⁸rab aqwām kī adālat kartā hai. ai rab, merī rāstbāzī aur begunāhī kā lihāz karke merā insāf kar.

⁹ai rāst ḳhudā, jo dil kī gahrāiyoṅ ko tah tak jāṅch letā hai, bedīnoṅ kī sharārateṅ ḳhatm kar aur rāstbāz ko qāim rakh.

¹⁰allāh merī ḍhāl hai. jo dil se sīdhī rāh par chalte haiṅ unheṅ wuh rihāī detā hai.

¹¹allāh ādil munsif hai, aisā ḳhudā jo rozānā logoṅ kī sarzanish kartā hai.

¹²yaqīnan is waqt bhī dushman apnī talwār ko tez kar rahā, apnī kamān ko tān kar nishānā bāndh rahā hai.

¹³lekin jo mohlak hathiyār aur jalte hue tīr us ne tayyār kar rakhe haiṅ un kī zad meṅ wuh ḳhud hī ā jāegā.

¹⁴dekh, burāī kā bīj us meṅ ug āyā hai. ab wuh sharārat se hāmilā ho kar phirtā aur jhūṭ ke bachche janm detā hai.

¹⁵lekin jo gaṛhā us ne dūsroṅ ko phaṅsāne ke lie khod khod kar tayyār kiyā us meṅ ḳhud gir paṛā hai.

¹⁶wuh ḳhud apnī sharārat kī zad meṅ āegā, us kā zulm us ke apne sar par nāzil hogā.

¹⁷maiṅ rab kī satāish karūṅga, kyūṅki wuh rāst hai. maiṅ rab t'ālā ke nām kī tārīf meṅ gīt gāūṅgā.