Read Roman Urdu Geo zabūr 71 Bible Online

zabūr 71 - Roman Urdu Geo bible

zabūr 71

¹ai rab, maiṅ ne tujh meṅ panāh lī hai. mujhe kabhī sharmindā na hone de.

²apnī rāstī se mujhe bachā kar chhuṭkārā de. apnā kān merī taraf jhukā kar mujhe najāt de.

³mere lie chaṭān par mahfūz ghar ho jis meṅ maiṅ har waqt panāh le sakūṅ. tū ne farmāyā hai ki mujhe najāt degā, kyūṅki tū hī merī chaṭān aur merā qilā hai.

⁴ai mere ḳhudā, mujhe bedīn ke hāth se bachā, us ke qabze se jo be'insāf aur zālim hai.

⁵kyūṅki tū hī merī ummīd hai. ai rab qādir-e-mutlaq, tū merī jawānī hī se merā bharosā rahā hai.

⁶paidāish se hī maiṅ ne tujh par takiyā kiyā hai, māṅ ke peṭ se tū ne mujhe saṅbhālā hai. maiṅ hameshā terī hamd-o-sanā karūṅga.

⁷bahutoṅ ke nazdīk maiṅ badshugūnī hūṅ, lekin tū merī mazbūt panāhgāh hai.

⁸din bhar merā muṅh terī tamjīd aur tāzīm se labrez rahtā hai.

⁹buṛhāpe meṅ mujhe radd na kar, tāqat ke ḳhatm hone par mujhe tark na kar.

¹⁰kyūṅki mere dushman mere bāre meṅ bāteṅ kar rahe haiṅ, jo merī jān kī tāk lagāe baiṭhe haiṅ wuh ek dūsre se salāh-mashwarā kar rahe haiṅ.

¹¹wuh kahte haiṅ, “allāh ne use tark kar diyā hai. us ke pīchhe paṛ kar use pakaṛo, kyūṅki koī nahīṅ jo use bachāe.”

¹²ai allāh, mujh se dūr na ho. ai mere ḳhudā, merī madad karne meṅ jaldī kar.

¹³mere harīf sharmindā ho kar fanā ho jāeṅ, jo mujhe nuqsān pahuṅchāne ke darpai haiṅ wuh lān-tān aur ruswāī tale dab jāeṅ.

¹⁴lekin maiṅ hameshā tere intizār meṅ rahūṅgā, hameshā terī satāish kartā rahūṅgā.

¹⁵merā muṅh terī rāstī sunātā rahegā, sārā din tere najātbaḳhsh kāmoṅ kā zikr kartā rahegā, go maiṅ un kī pūrī tādād gin bhī nahīṅ saktā.

¹⁶maiṅ rab qādir-e-mutlaq ke azīm kām sunāte hue āūṅgā, maiṅ terī, sirf terī hī rāstī yād karūṅga.

¹⁷ai allāh, tū merī jawānī se mujhe tālīm detā rahā hai, aur āj tak maiṅ tere mojizāt kā elān kartā āyā hūṅ.

¹⁸ai allāh, ḳhwāh maiṅ būṛhā ho jāūṅ aur mere bāl safed ho jāeṅ mujhe tark na kar jab tak maiṅ āne wālī pusht ke tamām logoṅ ko terī quwwat aur qudrat ke bāre meṅ batā na lūṅ.

¹⁹ai allāh, terī rāstī āsmān se bāteṅ kartī hai. ai allāh, tujh jaisā kaun hai jis ne itne azīm kām kie haiṅ?

²⁰tū ne mujhe muta'addid talḳh tajriboṅ meṅ se guzarne diyā hai, lekin tū mujhe dubārā zindā bhī karegā, tū mujhe zamīn kī gahrāiyoṅ meṅ se wāpas lāegā.

²¹merā rutbā baṛhā de, mujhe dubārā tasallī de.

²²ai mere ḳhudā, maiṅ sitār bajā kar terī satāish aur terī wafādārī kī tamjīd karūṅga. ai isrāīl ke quddūs, maiṅ sarod bajā kar terī tārīf meṅ gīt gāūṅgā.

²³jab maiṅ terī madahsarāī karūṅga to mere hoṅṭ ḳhushī ke nāre lagāeṅge, aur merī jān jise tū ne fidyā de kar chhuṛāyā hai shādiyānā bajāegī.

²⁴merī zabān bhī din bhar terī rāstī bayān karegī, kyūṅki jo mujhe nuqsān pahuṅchānā chāhte the wuh sharmsār aur ruswā ho gae haiṅ.