Read Roman Urdu Geo zabūr 72 Bible Online

zabūr 72 - Roman Urdu Geo bible

zabūr 72

¹sulaimān kā zabūr. ai allāh, bādshāh ko apnā insāf atā kar, bādshāh ke beṭe ko apnī rāstī baḳhsh de

²tāki wuh rāstī se terī qaum aur insāf se tere musībatzadoṅ kī adālat kare.

³pahāṛ qaum ko salāmatī aur pahāṛiyāṅ rāstī pahuṅchāeṅ.

⁴wuh qaum ke musībatzadoṅ kā insāf kare aur muhtājoṅ kī madad karke zālimoṅ ko kuchal de.

⁵tab log pusht-dar-pusht terā ḳhauf māneṅge jab tak sūraj chamke aur chāṅd raushnī de.

⁶wuh kaṭī huī ghās ke khet par barasne wālī bārish kī tarah utar āe, zamīn ko tar karne wālī bauchhāṛoṅ kī tarah nāzil ho jāe.

⁷us ke daur-e-hukūmat meṅ rāstbāz phale phūlegā, aur jab tak chāṅd nest na ho jāe salāmatī kā ġhalbā hogā.

⁸wuh ek samundar se dūsre samundar tak aur daryā-e-furāt se duniyā kī intihā tak hukūmat kare.

⁹registān ke bāshinde us ke sāmne jhuk jāeṅ, us ke dushman ḳhāk chāṭeṅ.

¹⁰tarsīs aur sāhilī ilāqoṅ ke bādshāh use ḳharāj pahuṅchāeṅ, sabā aur sibā use bāj pesh kareṅ.

¹¹tamām bādshāh use sijdā kareṅ, sab aqwām us kī ḳhidmat kareṅ.

¹²kyūṅki jo zarūratmand madad ke lie pukāre use wuh chhuṭkārā degā, jo musībat meṅ hai aur jis kī madad koī nahīṅ kartā use wuh rihāī degā.

¹³wuh pasthāloṅ aur ġharīboṅ par tars khāegā, muhtājoṅ kī jān ko bachāegā.

¹⁴wuh iwazānā de kar unheṅ zulm-o-tashaddud se chhuṛāegā, kyūṅki un kā ḳhūn us kī nazar meṅ qīmtī hai.

¹⁵bādshāh zindābād! sabā kā sonā use diyā jāe. log hameshā us ke lie duā kareṅ, din bhar us ke lie barkat chāheṅ.

¹⁶mulk meṅ anāj kī kasrat ho, pahāṛoṅ kī choṭiyoṅ par bhī us kī fasleṅ lahlahāeṅ. us kā phal lubnān ke phal jaisā umdā ho, shahroṅ ke bāshinde hariyālī kī tarah phaleṅ phūleṅ.

¹⁷bādshāh kā nām abad tak qāim rahe, jab tak sūraj chamke us kā nām phale phūle. tamām aqwām us se barkat pāeṅ, aur wuh use mubārak kaheṅ.

¹⁸rab ḳhudā kī tamjīd ho jo isrāīl kā ḳhudā hai. sirf wuhī mojize kartā hai!

¹⁹us ke jalālī nām kī abad tak tamjīd ho, pūrī duniyā us ke jalāl se bhar jāe. āmīn, phir āmīn.

²⁰yahāṅ dāūd bin yassī kī duāeṅ ḳhatm hotī haiṅ.