Read Roman Urdu Geo zabūr 73 Bible Online

zabūr 73 - Roman Urdu Geo bible

zabūr 73

¹āsaf kā zabūr. yaqīnan allāh isrāīl par mehrbān hai, un par jin ke dil pāk haiṅ.

²lekin maiṅ phisalne ko thā, mere qadam laġhzish khāne ko the.

³kyūṅki sheḳhībāzoṅ ko dekh kar maiṅ bechain ho gayā, is lie ki bedīn itne ḳhushhāl haiṅ.

⁴marte waqt un ko koī taqlīf nahīṅ hotī, aur un ke jism moṭe-tāze rahte haiṅ.

⁵ām logoṅ ke masāil se un kā wāstā nahīṅ paṛtā. jis dard-o-karab meṅ dūsre mubtalā rahte haiṅ us se wuh āzād hote haiṅ.

⁶is lie un ke gale meṅ takabbur kā hār hai, wuh zulm kā libās pahne phirte haiṅ.

⁷charbī ke bāis un kī āṅkheṅ ubhar āī haiṅ. un ke dil belagām wahmoṅ kī girift meṅ rahte haiṅ.

⁸wuh mazāq uṛā kar burī bāteṅ karte haiṅ, apne ġhurūr meṅ zulm kī dhamkiyāṅ dete haiṅ.

⁹wuh samajhte haiṅ ki jo kuchh hamāre muṅh se nikaltā hai wuh āsmān se hai, jo bāt hamārī zabān par ā jātī hai wuh pūrī zamīn ke lie ahmiyat rakhtī hai.

¹⁰chunāṅche awām un kī taraf rujū hote haiṅ, kyūṅki un ke hāṅ kasrat kā pānī piyā jātā hai.

¹¹wuh kahte haiṅ, “allāh ko kyā patā hai? allāh t'ālā ko ilm hī nahīṅ.”

¹²dekho, yihī hai bedīnoṅ kā hāl. wuh hameshā sukūn se rahte, hameshā apnī daulat meṅ izāfā karte haiṅ.

¹³yaqīnan maiṅ ne befāidā apnā dil pāk rakhā aur abas apne hāth ġhalat kām karne se bāz rakhe.

¹⁴kyūṅki din bhar maiṅ dard-o-karab meṅ mubtalā rahtā hūṅ, har subh mujhe sazā dī jātī hai.

¹⁵agar maiṅ kahtā, “maiṅ bhī un kī tarah bolūṅgā,” to tere farzandoṅ kī nasl se ġhaddārī kartā.

¹⁶maiṅ soch-bichār meṅ paṛ gayā tāki bāt samjhūṅ, lekin sochte sochte thak gayā, aziyat meṅ sirf izāfā huā.

¹⁷tab maiṅ allāh ke maqdis meṅ dāḳhil ho kar samajh gayā ki un kā anjām kyā hogā.

¹⁸yaqīnan tū unheṅ phisalnī jagah par rakhegā, unheṅ fareb meṅ phaṅsā kar zamīn par paṭaḳh degā.

¹⁹achānak hī wuh tabāh ho jāeṅge, dahshatnāk musībat meṅ phaṅs kar mukammal taur par fanā ho jāeṅge.

²⁰ai rab, jis tarah ḳhwāb jāg uṭhte waqt ġhairhaqīqī sābit hotā hai usī tarah tū uṭhte waqt unheṅ wahm qarār de kar haqīr jānegā.

²¹jab mere dil meṅ talḳhī paidā huī aur mere bātin meṅ saḳht dard thā

²²to maiṅ ahmaq thā. maiṅ kuchh nahīṅ samajhtā thā balki tere sāmne maweshī kī mānind thā.

²³to bhī maiṅ hameshā tere sāth lipṭā rahūṅgā, kyūṅki tū merā dahnā hāth thāme rakhtā hai.

²⁴tū apne mashware se merī qiyādat karke āḳhir meṅ izzat ke sāth merā ḳhairmaqdam karegā.

²⁵jab tū mere sāth hai to mujhe āsmān par kyā kamī hogī? jab tū mere sāth hai to maiṅ zamīn kī koī bhī chīz nahīṅ chāhūṅgā.

²⁶ḳhwāh merā jism aur merā dil jawāb de jāeṅ, lekin allāh hameshā tak mere dil kī chaṭān aur merī mīrās hai.

²⁷yaqīnan jo tujh se dūr haiṅ wuh halāk ho jāeṅge, jo tujh se bewafā haiṅ unheṅ tū tabāh kar degā.

²⁸lekin mere lie allāh kī qurbat sab kuchh hai. maiṅ ne rab qādir-e-mutlaq ko apnī panāhgāh banāyā hai, aur maiṅ logoṅ ko tere tamām kām sunāūṅgā.