Read Roman Urdu Geo zabūr 74 Bible Online

zabūr 74 - Roman Urdu Geo bible

zabūr 74

¹āsaf kā zabūr. hikmat kā gīt. ai allāh, tū ne hameṅ hameshā ke lie kyūṅ radd kiyā hai? apnī charāgāh kī bheṛoṅ par terā qahr kyūṅ bhaṛaktā rahtā hai?

²apnī jamā'at ko yād kar jise tū ne qadīm zamāne meṅ ḳharīdā aur iwazānā de kar chhuṛāyā tāki terī mīrās kā qabīlā ho. koh-e-siyyūn ko yād kar jis par tū sukūnatpazīr rahā hai.

³apne qadam in dāimī khanḍarāt kī taraf baṛhā. dushman ne maqdis meṅ sab kuchh tabāh kar diyā hai.

⁴tere muḳhālifoṅ ne garajte hue terī jalsāgāh meṅ apne nishān gāṛ die haiṅ.

⁵unhoṅ ne gunjān jangal meṅ lakkaṛhāroṅ kī tarah apne kulhāṛe chalāe,

⁶apne kulhāṛoṅ aur kudāloṅ se us kī tamām kandākārī ko ṭukṛe ṭukṛe kar diyā hai.

⁷unhoṅ ne tere maqdis ko bhasm kar diyā, farsh tak tere nām kī sukūnatgāh kī behurmatī kī hai.

⁸apne dil meṅ wuh bole, “āo, ham un sab ko ḳhāk meṅ milāeṅ!” unhoṅ ne mulk meṅ allāh kī har ibādatgāh nazar-e-ātish kar dī hai.

⁹ab ham par koī ilāhī nishān zāhir nahīṅ hotā. na koī nabī hamāre pās rah gayā, na koī aur maujūd hai jo jāntā ho ki aise hālāt kab tak raheṅge.

¹⁰ai allāh, harīf kab tak lān-tān karegā, dushman kab tak tere nām kī takfīr karegā?

¹¹tū apnā hāth kyūṅ haṭātā, apnā dahnā hāth dūr kyūṅ rakhtā hai? use apnī chādar se nikāl kar unheṅ tabāh kar de!

¹²allāh qadīm zamāne se merā bādshāh hai, wuhī duniyā meṅ najātbaḳhsh kām anjām detā hai.

¹³tū hī ne apnī qudrat se samundar ko chīr kar pānī meṅ azhdahāoṅ ke saroṅ ko toṛ ḍālā.

¹⁴tū hī ne liwiyātān ke saroṅ ko chūr chūr karke use janglī jānwaroṅ ko khilā diyā.

¹⁵ek jagah tū ne chashme aur nadiyāṅ phūṭne dīṅ, dūsrī jagah kabhī na sūkhne wāle daryā sūkhne die.

¹⁶din bhī terā hai, rāt bhī terī hī hai. chāṅd aur sūraj tere hī hāth se qāim hue.

¹⁷tū hī ne zamīn kī hudūd muqarrar kīṅ, tū hī ne garmiyoṅ aur sardiyoṅ ke mausam banāe.

¹⁸ai rab, dushman kī lān-tān yād kar. ḳhayāl kar ki ahmaq qaum tere nām par kufr baktī hai.

¹⁹apne kabūtar kī jān ko wahshī jānwaroṅ ke hawāle na kar, hameshā tak apne musībatzadoṅ kī zindagī ko na bhūl.

²⁰apne ahd kā lihāz kar, kyūṅki mulk ke tārīk kone zulm ke maidānoṅ se bhar gae haiṅ.

²¹hone na de ki mazlūmoṅ ko sharmindā ho kar pīchhe haṭnā paṛe balki baḳhsh de ki musībatzadā aur ġharīb tere nām par faḳhr kar sakeṅ.

²²ai allāh, uṭh kar adālat meṅ apne muāmale kā difā kar. yād rahe ki ahmaq din bhar tujhe lān-tān kartā hai.

²³apne dushmanoṅ ke nāre na bhūl balki apne muḳhālifoṅ kā musalsal baṛhtā huā shor-sharābā yād kar.