Read Roman Urdu Geo zabūr 77 Bible Online

zabūr 77 - Roman Urdu Geo bible

zabūr 77

¹āsaf kā zabūr. mausīqī ke rāhnumā ke lie. yadūtūn ke lie. maiṅ allāh se faryād karke madad ke lie chillātā hūṅ, maiṅ allāh ko pukārtā hūṅ ki mujh par dhyān de.

²apnī musībat meṅ maiṅ ne rab ko talāsh kiyā. rāt ke waqt mere hāth bilānāġhā us kī taraf uṭhe rahe. merī jān ne tasallī pāne se inkār kiyā.

³maiṅ allāh ko yād kartā hūṅ to āheṅ bharne lagtā hūṅ, maiṅ soch-bichār meṅ paṛ jātā hūṅ to rūh niḍhāl ho jātī hai. (silāh)

⁴tū merī āṅkhoṅ ko band hone nahīṅ detā. maiṅ itnā bechain hūṅ ki bol bhī nahīṅ saktā.

⁵maiṅ qadīm zamāne par ġhaur kartā hūṅ, un sāloṅ par jo baṛī der hue guzar gae haiṅ.

⁶rāt ko maiṅ apnā gīt yād kartā hūṅ. merā dil mahw-e-ḳhyāl rahtā aur merī rūh taftīsh kartī rahtī hai.

⁷“kyā rab hameshā ke lie radd karegā, kyā āindā hameṅ kabhī pasand nahīṅ karegā?

⁸kyā us kī shafqat hameshā ke lie jātī rahī hai? kyā us ke wāde ab se jawāb de gae haiṅ?

⁹kyā allāh mehrbānī karnā bhūl gayā hai? kyā us ne ġhusse meṅ apnā rahm bāz rakhā hai?” (silāh)

¹⁰maiṅ bolā, “is se mujhe dukh hai ki allāh t'ālā kā dahnā hāth badal gayā hai.”

¹¹maiṅ rab ke kām yād karūṅga, hāṅ qadīm zamāne ke tere mojize yād karūṅga.

¹²jo kuchh tū ne kiyā us ke har pahlū par ġhaur-o-ḳhauz karūṅga, tere azīm kāmoṅ meṅ mahw-e-ḳhyāl rahūṅgā.

¹³ai allāh, terī rāh quddūs hai. kaun sā mābūd hamāre ḳhudā jaisā azīm hai?

¹⁴tū hī mojize karne wālā ḳhudā hai. aqwām ke darmiyān tū ne apnī qudrat kā izhār kiyā hai.

¹⁵baṛī quwwat se tū ne iwazānā de kar apnī qaum, yāqūb aur yūsuf kī aulād ko rihā kar diyā hai. (silāh)

¹⁶ai allāh, pānī ne tujhe dekhā, pānī ne tujhe dekhā to taṛapne lagā, gahrāiyoṅ tak larazne lagā.

¹⁷mūslādhār bārish barsī, bādal garaj uṭhe aur tere tīr idhar udhar chalne lage.

¹⁸āṅdhī meṅ terī āwāz kaṛaktī rahī, duniyā bijliyoṅ se raushan huī, zamīn kāṅptī kāṅptī uchhal paṛī.

¹⁹terī rāh samundar meṅ se, terā rāstā gahre pānī meṅ se guzarā, to bhī tere naqsh-e-qadam kisī ko nazar na āe.

²⁰mūsā aur hārūn ke hāth se tū ne rewaṛ kī tarah apnī qaum kī rāhnumāī kī.