Read Roman Urdu Geo zabūr 78 Bible Online

zabūr 78 - Roman Urdu Geo bible

zabūr 78

¹āsaf kā zabūr. hikmat kā gīt. ai merī qaum, merī hidāyat par dhyān de, mere muṅh kī bātoṅ par kān lagā.

²maiṅ tamsīloṅ meṅ bāt karūṅga, qadīm zamāne ke muamme bayān karūṅga.

³jo kuchh ham ne sun liyā aur hameṅ mālūm huā hai, jo kuchh hamāre bāpdādā ne hameṅ sunāyā hai

⁴use ham un kī aulād se nahīṅ chhupāeṅge. ham āne wālī pusht ko rab ke qābil-e-tārīf kām batāeṅge, us kī qudrat aur mojizāt bayān kareṅge.

⁵kyūṅki us ne yāqūb kī aulād ko sharīat dī, isrāīl meṅ ahkām qāim kie. us ne farmāyā ki hamāre bāpdādā yih ahkām apnī aulād ko sikhāeṅ

⁶tāki āne wālī pusht bhī unheṅ apnāe, wuh bachche jo abhī paidā nahīṅ hue the. phir unheṅ bhī apne bachchoṅ ko sunānā thā.

⁷kyūṅki allāh kī marzī hai ki is tarah har pusht allāh par etimād rakh kar us ke azīm kām na bhūle balki us ke ahkām par amal kare.

⁸wuh nahīṅ chāhtā ki wuh apne bāpdādā kī mānind hoṅ jo ziddī aur sarkash nasl the, aisī nasl jis kā dil sābitqadam nahīṅ thā aur jis kī rūh wafādārī se allāh se lipṭī na rahī.

⁹chunāṅche ifrāīm ke mard go kamānoṅ se les the jang ke waqt farār hue.

¹⁰wuh allāh ke ahd ke wafādār na rahe, us kī sharīat par amal karne ke lie tayyār nahīṅ the.

¹¹jo kuchh us ne kiyā thā, jo mojize us ne unheṅ dikhāe the, ifrāīmī wuh sab kuchh bhūl gae.

¹²mulk-e-misr ke ilāqe zuan meṅ us ne un ke bāpdādā ke deḳhte deḳhte mojize kie the.

¹³samundar ko chīr kar us ne unheṅ us meṅ se guzarne diyā, aur donoṅ taraf pānī mazbūt dīwār kī tarah khaṛā rahā.

¹⁴din ko us ne bādal ke zarī'e aur rāt bhar chamakdār āg se un kī qiyādat kī.

¹⁵registān meṅ us ne pattharoṅ ko chāk karke unheṅ samundar kī sī kasrat kā pānī pilāyā.

¹⁶us ne hone diyā ki chaṭān se nadiyāṅ phūṭ nikleṅ aur pānī daryāoṅ kī tarah bahne lage.

¹⁷lekin wuh us kā gunāh karne se bāz na āe balki registān meṅ allāh t'ālā se sarkash rahe.

¹⁸jān-būjh kar unhoṅ ne allāh ko āzmā kar wuh ḳhurāk māṅgī jis kā lālach karte the.

¹⁹allāh ke ḳhilāf kufr bak kar wuh bole, “kyā allāh registān meṅ hamāre lie mez bichhā saktā hai?

²⁰beshak jab us ne chaṭān ko mārā to pānī phūṭ niklā aur nadiyāṅ bahne lagīṅ. lekin kyā wuh roṭī bhī de saktā hai, apnī qaum ko gosht bhī muhayyā kar saktā hai? yih to nāmumkin hai.”

²¹yih sun kar rab taish meṅ ā gayā. yāqūb ke ḳhilāf āg bhaṛak uṭhī, aur us kā ġhazab isrāīl par nāzil huā.

²²kyūṅ? is lie ki unheṅ allāh par yaqīn nahīṅ thā, wuh us kī najāt par bharosā nahīṅ rakhte the.

²³is ke bāwujūd allāh ne un ke ūpar bādaloṅ ko hukm de kar āsmān ke darwāze khol die.

²⁴us ne khāne ke lie un par man barsāyā, unheṅ āsmān se roṭī khilāī.

²⁵har ek ne farishtoṅ kī yih roṭī khāī balki allāh ne itnā khānā bhejā ki un ke peṭ bhar gae.

²⁶phir us ne āsmān par mashriqī hawā chalāī aur apnī qudrat se junūbī hawā pahuṅchāī.

²⁷us ne gard kī tarah un par gosht barsāyā, samundar kī ret jaise beshumār parinde un par girne die.

²⁸ḳhaimāgāh ke bīch meṅ hī wuh gir paṛe, un ke gharoṅ ke irdgird hī zamīn par ā gire.

²⁹tab wuh khā khā kar ḳhūb ser ho gae. kyūṅki jis kā lālach wuh karte the wuh allāh ne unheṅ muhayyā kiyā thā.

³⁰lekin un kā lālach abhī pūrā nahīṅ huā thā aur gosht abhī un ke muṅh meṅ thā

³¹ki allāh kā ġhazab un par nāzil huā. qaum ke khāte-pīte log halāk hue, isrāīl ke jawān ḳhāk meṅ mil gae.

³²in tamām bātoṅ ke bāwujūd wuh apne gunāhoṅ meṅ izāfā karte gae aur us ke mojizāt par īmān na lāe.

³³is lie us ne un ke din nākāmī meṅ guzarne die, aur un ke sāl dahshat kī hālat meṅ iḳhtitāmpazīr hue.

³⁴jab kabhī allāh ne un meṅ qatl-o-ġhārat hone dī to wuh use ḍhūṅḍne lage, wuh muṛ kar allāh ko talāsh karne lage.

³⁵tab unheṅ yād āyā ki allāh hamārī chaṭān, allāh t'ālā hamārā chhuṛāne wālā hai.

³⁶lekin wuh muṅh se use dhokā dete, zabān se use jhūṭ pesh karte the.

³⁷na un ke dil sābitqadmī se us ke sāth lipṭe rahe, na wuh us ke ahd ke wafādār rahe.

³⁸to bhī allāh rahm dil rahā. us ne unheṅ tabāh na kiyā balki un kā qusūr muāf kartā rahā. bār bār wuh apne ġhazab se bāz āyā, bār bār apnā pūrā qahr un par utārne se gurez kiyā.

³⁹kyūṅki use yād rahā ki wuh fānī insān haiṅ, hawā kā ek jhoṅkā jo guzar kar kabhī wāpas nahīṅ ātā.

⁴⁰registān meṅ wuh kitnī dafā us se sarkash hue, kitnī martabā use dukh pahuṅchāyā.

⁴¹bār bār unhoṅ ne allāh ko āzmāyā, bār bār isrāīl ke quddūs ko ranjīdā kiyā.

⁴²unheṅ us kī qudrat yād na rahī, wuh din jab us ne fidyā de kar unheṅ dushman se chhuṛāyā,

⁴³wuh din jab us ne misr meṅ apne ilāhī nishān dikhāe, zuan ke ilāqe meṅ apne mojize kie.

⁴⁴us ne un kī nahroṅ kā pānī ḳhūn meṅ badal diyā, aur wuh apnī nadiyoṅ kā pānī pī na sake.

⁴⁵us ne un ke darmiyān jū'oṅ ke ġhol bheje jo unheṅ khā gaīṅ, meṅḍak jo un par tabāhī lāe.

⁴⁶un kī paidāwār us ne jawān ṭiḍḍiyoṅ ke hawāle kī, un kī mehnat kā phal bāliġh ṭiḍḍiyoṅ ke sapurd kiyā.

⁴⁷un kī angūr kī beleṅ us ne oloṅ se, un ke anjīr-tūt ke daraḳht sailāb se tabāh kar die.

⁴⁸un ke maweshī us ne oloṅ ke hawāle kie, un ke rewaṛ bijlī ke sapurd kie.

⁴⁹us ne un par apnā sholāzan ġhazab nāzil kiyā. qahr, ḳhafagī aur musībat yānī tabāhī lāne wāle farishtoṅ kā pūrā dastā un par hamlā-āwar huā.

⁵⁰us ne apne ġhazab ke lie rāstā tayyār karke unheṅ maut se na bachāyā balki mohlak wabā kī zad meṅ āne diyā.

⁵¹misr meṅ us ne tamām pahlauṭhoṅ ko mār ḍālā aur hām ke ḳhaimoṅ meṅ mardānagī kā pahlā phal tamām kar diyā.

⁵²phir wuh apnī qaum ko bheṛ-bakriyoṅ kī tarah misr se bāhar lā kar registān meṅ rewaṛ kī tarah lie phirā.

⁵³wuh hifāzat se un kī qiyādat kartā rahā. unheṅ koī ḍar nahīṅ thā jabki un ke dushman samundar meṅ ḍūb gae.

⁵⁴yūṅ allāh ne unheṅ muqaddas mulk tak pahuṅchāyā, us pahāṛ tak jise us ke dahne hāth ne hāsil kiyā thā.

⁵⁵un ke āge āge wuh dīgar qaumeṅ nikāltā gayā. un kī zamīn us ne taqsīm karke isrāīliyoṅ ko mīrās meṅ dī, aur un ke ḳhaimoṅ meṅ us ne isrāīlī qabīle basāe.

⁵⁶is ke bāwujūd wuh allāh t'ālā ko āzmāne se bāz na āe balki us se sarkash hue aur us ke ahkām ke tābe na rahe.

⁵⁷apne bāpdādā kī tarah wuh ġhaddār ban kar bewafā hue. wuh ḍhīlī kamān kī tarah nākām ho gae.

⁵⁸unhoṅ ne ūṅchī jaghoṅ kī ġhalat qurbāngāhoṅ se allāh ko ġhussā dilāyā aur apne butoṅ se use ranjīdā kiyā.

⁵⁹jab allāh ko ḳhabar milī to wuh ġhazabnāk huā aur isrāīl ko mukammal taur par mustarad kar diyā.

⁶⁰us ne sailā meṅ apnī sukūnatgāh chhoṛ dī, wuh ḳhaimā jis meṅ wuh insān ke darmiyān sukūnat kartā thā.

⁶¹ahd kā sandūq us kī qudrat aur jalāl kā nishān thā, lekin us ne use dushman ke hawāle karke jilāwatanī meṅ jāne diyā.

⁶²apnī qaum ko us ne talwār kī zad meṅ āne diyā, kyūṅki wuh apnī maurūsī milkiyat se nihāyat nārāz thā.

⁶³qaum ke jawān nazar-e-ātish hue, aur us kī kuṅwāriyoṅ ke lie shādī ke gīt gāe na gae.

⁶⁴us ke imām talwār se qatl hue, aur us kī bewāoṅ ne mātam na kiyā.

⁶⁵tab rab jāg uṭhā, us ādmī kī tarah jis kī nīnd uchāṭ ho gaī ho, us sūrme kī mānind jis se nashe kā asar utar gayā ho.

⁶⁶us ne apne dushmanoṅ ko mār mār kar bhagā diyā aur unheṅ hameshā ke lie sharmindā kar diyā.

⁶⁷us waqt us ne yūsuf kā ḳhaimā radd kiyā aur ifrāīm ke qabīle ko na chunā

⁶⁸balki yahūdāh ke qabīle aur koh-e-siyyūn ko chun liyā jo use pyārā thā.

⁶⁹us ne apnā maqdis bulandiyoṅ kī mānind banāyā, zamīn kī mānind jise us ne hameshā ke lie qāim kiyā hai.

⁷⁰us ne apne ḳhādim dāūd ko chun kar bheṛ-bakriyoṅ ke bāṛoṅ se bulāyā.

⁷¹hāṅ, us ne use bheṛoṅ [14] kī dekh-bhāl se bulāyā tāki wuh us kī qaum yāqūb, us kī mīrās isrāīl kī gallābānī kare.

⁷²dāūd ne ḳhulūsdilī se un kī gallābānī kī, baṛī mahārat se us ne un kī rāhnumāī kī.