Read Roman Urdu Geo zabūr 79 Bible Online

zabūr 79 - Roman Urdu Geo bible

zabūr 79

¹āsaf kā zabūr. ai allāh, ajnabī qaumeṅ terī maurūsī zamīn meṅ ghus āī haiṅ. unhoṅ ne terī muqaddas sukūnatgāh kī behurmatī karke yarūshalam ko malbe kā ḍher banā diyā hai.

²unhoṅ ne tere ḳhādimoṅ kī lāsheṅ parindoṅ ko aur tere īmāndāroṅ kā gosht janglī jānwaroṅ ko khilā diyā hai.

³yarūshalam ke chāroṅ taraf unhoṅ ne ḳhūn kī nadiyāṅ bahāīṅ, aur koī bāqī na rahā jo murdoṅ ko dafnātā.

⁴hamāre paṛosiyoṅ ne hameṅ mazāq kā nishānā banā liyā hai, irdgird kī qaumeṅ hamārī haṅsī uṛātī aur lān-tān kartī haiṅ.

⁵ai rab, kab tak? kyā tū hameshā tak ġhusse hogā? terī ġhairat kab tak āg kī tarah bhaṛaktī rahegī?

⁶apnā ġhazab un aqwām par nāzil kar jo tujhe taslīm nahīṅ kartīṅ, un saltanatoṅ par jo tere nām ko nahīṅ pukārtīṅ.

⁷kyūṅki unhoṅ ne yāqūb ko haṛap karke us kī rihāishgāh tabāh kar dī hai.

⁸hameṅ un gunāhoṅ ke qusūrwār na ṭhahrā jo hamāre bāpdādā se sarzad hue. ham par rahm karne meṅ jaldī kar, kyūṅki ham bahut pasthāl ho gae haiṅ.

⁹ai hamārī najāt ke ḳhudā, hamārī madad kar tāki tere nām ko jalāl mile. hameṅ bachā, apne nām kī ḳhātir hamāre gunāhoṅ ko muāf kar.

¹⁰dīgar aqwām kyūṅ kaheṅ, “un kā ḳhudā kahāṅ hai?” hamāre deḳhte deḳhte unheṅ dikhā ki tū apne ḳhādimoṅ ke ḳhūn kā badlā letā hai.

¹¹qaidiyoṅ kī āheṅ tujh tak pahuṅchīṅ, jo marne ko haiṅ unheṅ apnī azīm qudrat se mahfūz rakh.

¹²ai rab, jo lān-tān hamāre paṛosiyoṅ ne tujh par barsāī hai use sāt gunā un ke saroṅ par wāpas lā.

¹³tab ham jo terī qaum aur terī charāgāh kī bheṛeṅ haiṅ abad tak terī satāish kareṅge, pusht-dar-pusht terī hamd-o-sanā kareṅge.