Read Roman Urdu Geo zabūr 8 Bible Online

zabūr 8 - Roman Urdu Geo bible

zabūr 8

¹dāūd kā zabūr. mausīqī ke rāhnumā ke lie. tarz: gittīt. ai rab hamāre āqā, terā nām pūrī duniyā meṅ kitnā shāndār hai! tū ne āsmān par hī apnā jalāl zāhir kar diyā hai.

²apne muḳhālifoṅ ke jawāb meṅ tū ne chhoṭe bachchoṅ aur shīrḳhwāroṅ kī zabān ko tayyār kiyā hai tāki wuh terī quwwat se dushman aur kīnāparwar ko ḳhatm kareṅ.

³jab maiṅ tere āsmān kā mulāhazā kartā hūṅ jo terī ungliyoṅ kā kām hai, chāṅd aur sitāroṅ par ġhaur kartā hūṅ jin ko tū ne apnī apnī jagah par qāim kiyā

⁴to insān kaun hai ki tū use yād kare yā ādamzād ki tū us kā ḳhayāl rakhe?

⁵tū ne use farishtoṅ se kuchh hī kam banāyā, [2] tū ne use jalāl aur izzat kā tāj pahnāyā.

⁶tū ne use apne hāthoṅ ke kāmoṅ par muqarrar kiyā, sab kuchh us ke pāoṅ ke nīche kar diyā,

⁷ḳhwāh bheṛ-bakriyāṅ hoṅ ḳhwāh gāy-bail, janglī jānwar,

⁸parinde, machhliyāṅ yā samundarī rāhoṅ par chalne wāle bāqī tamām jānwar.

⁹ai rab hamāre āqā, pūrī duniyā meṅ terā nām kitnā shāndār hai!