Read Roman Urdu Geo zabūr 80 Bible Online

zabūr 80 - Roman Urdu Geo bible

zabūr 80

¹āsaf kā zabūr. mausīqī ke rāhnumā ke lie. tarz: ahd ke sosan. ai isrāīl ke gallābān, ham par dhyān de! tū jo yūsuf kī rewaṛ kī tarah rāhnumāī kartā hai, ham par tawajjuh kar! tū jo karūbī farishtoṅ ke darmiyān taḳhtnashīn hai, apnā nūr chamkā!

²ifrāīm, binyamīn aur manassī ke sāmne apnī qudrat ko harkat meṅ lā. hameṅ bachāne ā!

³ai allāh, hameṅ bahāl kar. apne chehre kā nūr chamkā to ham najāt pāeṅge.

⁴ai rab, lashkaroṅ ke ḳhudā, terā ġhazab kab tak bhaṛaktā rahegā, hālāṅki terī qaum tujh se iltijā kar rahī hai?

⁵tū ne unheṅ āṅsū'oṅ kī roṭī khilāī aur āṅsū'oṅ kā pyālā ḳhūb pilāyā.

⁶tū ne hameṅ paṛosiyoṅ ke jhagaṛoṅ kā nishānā banāyā. hamāre dushman hamārā mazāq uṛāte haiṅ.

⁷ai lashkaroṅ ke ḳhudā, hameṅ bahāl kar. apne chehre kā nūr chamkā to ham najāt pāeṅge.

⁸angūr kī jo bel misr meṅ ug rahī thī use tū ukhāṛ kar mulk-e-kan'ān lāyā. tū ne wahāṅ kī aqwām ko bhagā kar yih bel un kī jagah lagāī.

⁹tū ne us ke lie zamīn tayyār kī to wuh jaṛ pakaṛ kar pūre mulk meṅ phail gaī.

¹⁰us kā sāyā pahāṛoṅ par chhā gayā, aur us kī shāḳhoṅ ne deodār ke azīm daraḳhtoṅ ko ḍhāṅk liyā.

¹¹us kī ṭahniyāṅ maġhrib meṅ samundar tak phail gaīṅ, us kī ḍāliyāṅ mashriq meṅ daryā-e-furāt tak pahuṅch gaīṅ.

¹²tū ne us kī chārdīwārī kyūṅ girā dī? ab har guzarne wālā us ke angūr toṛ letā hai.

¹³jangal ke sūar use khā khā kar tabāh karte, khule maidān ke jānwar wahāṅ charte haiṅ.

¹⁴ai lashkaroṅ ke ḳhudā, hamārī taraf dubārā rujū farmā! āsmān se nazar ḍāl kar hālāt par dhyān de. is bel kī dekh-bhāl kar.

¹⁵use mahfūz rakh jise tere dahne hāth ne zamīn meṅ lagāyā, us beṭe ko jise tū ne apne lie pālā hai.

¹⁶is waqt wuh kaṭ kar nazar-e-ātish huā hai. tere chehre kī ḍānṭ-ḍapaṭ se log halāk ho jāte haiṅ.

¹⁷terā hāth apne dahne hāth ke bande ko panāh de, us ādamzād ko jise tū ne apne lie pālā thā.

¹⁸tab ham tujh se dūr nahīṅ ho jāeṅge. baḳhsh de ki hamārī jān meṅ jān āe to ham terā nām pukāreṅge.

¹⁹ai rab, lashkaroṅ ke ḳhudā, hameṅ bahāl kar. apne chehre kā nūr chamkā to ham najāt pāeṅge.