Read Roman Urdu Geo zabūr 81 Bible Online

zabūr 81 - Roman Urdu Geo bible

zabūr 81

¹āsaf kā zabūr. mausīqī ke rāhnumā ke lie. tarz: gittīt. allāh hamārī quwwat hai. us kī ḳhushī meṅ shādiyānā bajāo, yāqūb ke ḳhudā kī tāzīm meṅ ḳhushī ke nāre lagāo.

²gīt gānā shurū karo. daf bajāo, sarod aur sitār kī surīlī āwāz nikālo.

³nae chāṅd ke din narsingā phūṅko, pūre chāṅd ke jis din hamārī īd hotī hai use phūṅko.

⁴kyūṅki yih isrāīl kā farz hai, yih yāqūb ke ḳhudā kā farmān hai.

⁵jab yūsuf misr ke ḳhilāf niklā to allāh ne ḳhud yih muqarrar kiyā. maiṅ ne ek zabān sunī, jo maiṅ ab tak nahīṅ jāntā thā,

⁶“maiṅ ne us ke kandhe par se bojh utārā aur us ke hāth bhārī ṭokrī uṭhāne se āzād kie.

⁷musībat meṅ tū ne āwāz dī to maiṅ ne tujhe bachāyā. garajte bādal meṅ se maiṅ ne tujhe jawāb diyā aur tujhe marībā ke pānī par āzmāyā. (silāh)

⁸ai merī qaum, sun, to maiṅ tujhe āgāh karūṅga. ai isrāīl, kāsh tū merī sune!

⁹tere darmiyān koī aur ḳhudā na ho, kisī ajnabī mābūd ko sijdā na kar.

¹⁰maiṅ hī rab terā ḳhudā hūṅ jo tujhe mulk-e-misr se nikāl lāyā. apnā muṅh ḳhūb khol to maiṅ use bhar dūṅgā.

¹¹lekin merī qaum ne merī na sunī, isrāīl merī bāt mānane ke lie tayyār na thā.

¹²chunāṅche maiṅ ne unheṅ un ke diloṅ kī zid ke hawāle kar diyā, aur wuh apne zātī mashwaroṅ ke mutābiq zindagī guzārne lage.

¹³kāsh merī qaum sune, isrāīl merī rāhoṅ par chale!

¹⁴tab maiṅ jaldī se us ke dushmanoṅ ko zer kartā, apnā hāth us ke muḳhālifoṅ ke ḳhilāf uṭhātā.

¹⁵tab rab se nafrat karne wāle dabak kar us kī ḳhushāmad karte, un kī shikast abadī hotī.

¹⁶lekin isrāīl ko maiṅ behtarīn gandum khilātā, maiṅ chaṭān meṅ se shahd nikāl kar use ser kartā.”