Read Roman Urdu Geo zabūr 83 Bible Online

zabūr 83 - Roman Urdu Geo bible

zabūr 83

¹gīt. āsaf kā zabūr. ai allāh, ḳhāmosh na rah! ai allāh, chup na rah!

²dekh, tere dushman shor machā rahe haiṅ, tujh se nafrat karne wāle apnā sar tere ḳhilāf uṭhā rahe haiṅ.

³terī qaum ke ḳhilāf wuh chālāk mansūbe bāndh rahe haiṅ, jo terī āṛ meṅ chhup gae haiṅ un ke ḳhilāf sāzisheṅ kar rahe haiṅ.

⁴wuh kahte haiṅ, “āo, ham unheṅ miṭā deṅ tāki qaum nest ho jāe aur isrāīl kā nām-o-nishān bāqī na rahe.”

⁵kyūṅki wuh āpas meṅ salāh-mashwarā karne ke bād dilī taur par muttahid ho gae haiṅ, unhoṅ ne tere hī ḳhilāf ahd bāndhā hai.

⁶un meṅ adom ke ḳhaime, ismāīlī, moāb, hājirī,

⁷jabāl, ammon, amālīq, filistiyā aur sūr ke bāshinde shāmil ho gae haiṅ.

⁸asūr bhī un meṅ sharīk ho kar lūt kī aulād ko sahārā de rahā hai. (silāh)

⁹un ke sāth wuhī sulūk kar jo tū ne midiyāniyoṅ se yānī qaison nadī par sīsarā aur yābīn se kiyā.

¹⁰kyūṅki wuh ain-dor ke pās halāk ho kar khet meṅ gobar ban gae.

¹¹un ke shurafā ke sāth wuhī bartāo kar jo tū ne oreb aur zaeb se kiyā. un ke tamām sardār zibah aur zalmunnā kī mānind ban jāeṅ,

¹²jinhoṅ ne kahā, “āo, ham allāh kī charāgāhoṅ par qabzā kareṅ.”

¹³ai mere ḳhudā, unheṅ luṛhakbūṭī aur hawā meṅ uṛte hue bhūse kī mānind banā de.

¹⁴jis tarah āg pūre jangal meṅ phail jātī aur ek hī sholā pahāṛoṅ ko jhulsā detā hai,

¹⁵usī tarah apnī āṅdhī se un kā tāqqub kar, apne tūfān se un ko dahshatzadā kar de.

¹⁶ai rab, un kā muṅh kālā kar tāki wuh terā nām talāsh kareṅ.

¹⁷wuh hameshā tak sharmindā aur hawāsbāḳhtā raheṅ, wuh sharmsār ho kar halāk ho jāeṅ.

¹⁸tab hī wuh jān leṅge ki tū hī jis kā nām rab hai allāh t'ālā yānī pūrī duniyā kā mālik hai.