Read Roman Urdu Geo zabūr 86 Bible Online

zabūr 86 - Roman Urdu Geo bible

zabūr 86

¹dāūd kī duā. ai rab, apnā kān jhukā kar merī sun, kyūṅki maiṅ musībatzadā aur muhtāj hūṅ.

²merī jān ko mahfūz rakh, kyūṅki maiṅ īmāndār hūṅ. apne ḳhādim ko bachā jo tujh par bharosā rakhtā hai. tū hī merā ḳhudā hai!

³ai rab, mujh par mehrbānī kar, kyūṅki din bhar maiṅ tujhe pukārtā hūṅ.

⁴apne ḳhādim kī jān ko ḳhush kar, kyūṅki maiṅ terā ārzūmand hūṅ.

⁵kyūṅki tū ai rab bhalā hai, tū muāf karne ke lie tayyār hai. jo bhī tujhe pukārte haiṅ un par tū baṛī shafqat kartā hai.

⁶ai rab, merī duā sun, merī iltijāoṅ par tawajjuh kar.

⁷musībat ke din maiṅ tujhe pukārtā hūṅ, kyūṅki tū merī suntā hai.

⁸ai rab, mābūdoṅ meṅ se koī terī mānind nahīṅ hai. jo kuchh tū kartā hai koī aur nahīṅ kar saktā.

⁹ai rab, jitnī bhī qaumeṅ tū ne banāīṅ wuh ā kar tere huzūr sijdā kareṅgī aur tere nām ko jalāl deṅgī.

¹⁰kyūṅki tū hī azīm hai aur mojize kartā hai. tū hī ḳhudā hai.

¹¹ai rab, mujhe apnī rāh sikhā tāki terī wafādārī meṅ chalūṅ. baḳhsh de ki maiṅ pūre dil se terā ḳhauf mānūṅ.

¹²ai rab mere ḳhudā, maiṅ pūre dil se terā shukr karūṅga, hameshā tak tere nām kī tāzīm karūṅga.

¹³kyūṅki terī mujh par shafqat azīm hai, tū ne merī jān ko pātāl kī gahrāiyoṅ se chhuṛāyā hai.

¹⁴ai allāh, maġhrūr mere ḳhilāf uṭh khaṛe hue haiṅ, zālimoṅ kā jaththā merī jān lene ke darpai hai. yih log terā lihāz nahīṅ karte.

¹⁵lekin tū, ai rab, rahīm aur mehrbān ḳhudā hai. tū tahammul, shafqat aur wafā se bharpūr hai.

¹⁶merī taraf rujū farmā, mujh par mehrbānī kar! apne ḳhādim ko apnī quwwat atā kar, apnī ḳhādimā ke beṭe ko bachā.

¹⁷mujhe apnī mehrbānī kā koī nishān dikhā. mujh se nafrat karne wāle yih dekh kar sharmindā ho jāeṅ ki tū rab ne merī madad karke mujhe tasallī dī hai.