Read Roman Urdu Geo zabūr 88 Bible Online

zabūr 88 - Roman Urdu Geo bible

zabūr 88

¹qorah kī aulād kā zabūr. mausīqī ke rāhnumā ke lie. tarz: mahalat lannot. haimān izrāhī kā hikmat kā gīt. ai rab, ai merī najāt ke ḳhudā, din rāt maiṅ tere huzūr chīḳhtā chillātā hūṅ.

²merī duā tere huzūr pahuṅche, apnā kān merī chīḳhoṅ kī taraf jhukā.

³kyūṅki merī jān dukh se bharī hai, aur merī ṭāṅgeṅ qabr meṅ laṭkī huī haiṅ.

⁴mujhe un meṅ shumār kiyā jātā hai jo pātāl meṅ utar rahe haiṅ. maiṅ us mard kī mānind hūṅ jis kī tamām tāqat jātī rahī hai.

⁵mujhe murdoṅ meṅ tanhā chhoṛā gayā hai, qabr meṅ un maqtūloṅ kī tarah jin kā tū ab ḳhayāl nahīṅ rakhtā aur jo tere hāth ke sahāre se munqate ho gae haiṅ.

⁶tū ne mujhe sab se gahre gaṛhe meṅ, tārīktarīn gahrāiyoṅ meṅ ḍāl diyā hai.

⁷tere ġhazab kā pūrā bojh mujh par ā paṛā hai, tū ne mujhe apnī tamām maujoṅ ke nīche dabā diyā hai. (silāh)

⁸tū ne mere qarībī dostoṅ ko mujh se dūr kar diyā hai, aur ab wuh mujh se ghin khāte haiṅ. maiṅ phaṅsā huā hūṅ aur nikal nahīṅ saktā.

⁹merī āṅkheṅ ġham ke māre pazhmurdā ho gaī haiṅ. ai rab, din bhar maiṅ tujhe pukārtā, apne hāth terī taraf uṭhāe rakhtā hūṅ.

¹⁰kyā tū murdoṅ ke lie mojize karegā? kyā pātāl ke bāshinde uṭh kar terī tamjīd kareṅge? (silāh)

¹¹kyā log qabr meṅ terī shafqat yā pātāl meṅ terī wafā bayān kareṅge?

¹²kyā tārīkī meṅ tere mojize yā mulk-e-farāmosh meṅ terī rāstī mālūm ho jāegī?

¹³lekin ai rab, maiṅ madad ke lie tujhe pukārtā hūṅ, merī duā subhsawere tere sāmne ā jātī hai.

¹⁴ai rab, tū merī jān ko kyūṅ radd kartā, apne chehre ko mujh se poshīdā kyūṅ rakhtā hai?

¹⁵maiṅ musībatzadā aur jawānī se maut ke qarīb rahā hūṅ. tere dahshatnāk hamle bardāsht karte karte maiṅ jān se hāth dho baiṭhā hūṅ.

¹⁶terā bhaṛaktā qahr mujh par se guzar gayā, tere haulnāk kāmoṅ ne mujhe nābūd kar diyā hai.

¹⁷din bhar wuh mujhe sailāb kī tarah ghere rakhte haiṅ, har taraf se mujh par hamlā-āwar hote haiṅ.

¹⁸tū ne mere dostoṅ aur paṛosiyoṅ ko mujh se dūr kar rakhā hai. tārīkī hī merī qarībī dost ban gaī hai.