Read Roman Urdu Geo zabūr 89 Bible Online

zabūr 89 - Roman Urdu Geo bible

zabūr 89

¹aitān izrāhī kā hikmat kā gīt. maiṅ abad tak rab kī mehrbāniyoṅ kī madahsarāī karūṅga, pusht-dar-pusht muṅh se terī wafā kā elān karūṅga.

²kyūṅki maiṅ bolā, “terī shafqat hameshā tak qāim hai, tū ne apnī wafā kī mazbūt bunyād āsmān par hī rakhī hai.”

³tū ne farmāyā, “maiṅ ne apne chune hue bande se ahd bāndhā, apne ḳhādim dāūd se qasam khā kar wādā kiyā hai,

⁴‘maiṅ terī nasl ko hameshā tak qāim rakhūṅgā, terā taḳht hameshā tak mazbūt rakhūṅgā’.” (silāh)

⁵ai rab, āsmān tere mojizoṅ kī satāish kareṅge, muqaddasīn kī jamā'at meṅ hī terī wafādārī kī tamjīd kareṅge.

⁶kyūṅki bādaloṅ meṅ kaun rab kī mānind hai? ilāhī hastiyoṅ meṅ se kaun rab kī mānind hai?

⁷jo bhī muqaddasīn kī majlis meṅ shāmil haiṅ wuh allāh se ḳhauf khāte haiṅ. jo bhī us ke irdgird hote haiṅ un par us kī azmat aur rob chhāyā rahtā hai.

⁸ai rab, ai lashkaroṅ ke ḳhudā, kaun terī mānind hai? ai rab, tū qawī aur apnī wafā se ghirā rahtā hai.

⁹tū ṭhāṭheṅ mārte hue samundar par hukūmat kartā hai. jab wuh maujzan ho to tū use thamā detā hai.

¹⁰tū ne samundarī azhdahe rahab ko kuchal diyā, aur wuh maqtūl kī mānind ban gayā. apne qawī bāzū se tū ne apne dushmanoṅ ko titar-bitar kar diyā.

¹¹āsmān-o-zamīn tere hī haiṅ. duniyā aur jo kuchh us meṅ hai tū ne qāim kiyā.

¹²tū ne shimāl-o-junūb ko ḳhalaq kiyā. tabūr aur harmūn tere nām kī ḳhushī meṅ nāre lagāte haiṅ.

¹³terā bāzū qawī aur terā hāth tāqatwar hai. terā dahnā hāth azīm kām karne ke lie tayyār hai.

¹⁴rāstī aur insāf tere taḳht kī bunyād haiṅ. shafqat aur wafā tere āge āge chaltī haiṅ.

¹⁵mubārak hai wuh qaum jo terī ḳhushī ke nāre lagā sake. ai rab, wuh tere chehre ke nūr meṅ chaleṅge.

¹⁶rozānā wuh tere nām kī ḳhushī manāeṅge aur terī rāstī se sarfarāz hoṅge.

¹⁷kyūṅki tū hī un kī tāqat kī shān hai, aur tū apne karm se hameṅ sarfarāz karegā.

¹⁸kyūṅki hamārī ḍhāl rab hī kī hai, hamārā bādshāh isrāīl ke quddūs hī kā hai.

¹⁹māzī meṅ tū royā meṅ apne īmāndāroṅ se hamkalām huā. us waqt tū ne farmāyā, “maiṅ ne ek sūrme ko tāqat se nawāzā hai, qaum meṅ se ek ko chun kar sarfarāz kiyā hai.

²⁰maiṅ ne apne ḳhādim dāūd ko pā liyā aur use apne muqaddas tel se masah kiyā hai.

²¹merā hāth use qāim rakhegā, merā bāzū use taqwiyat degā.

²²dushman us par ġhālib nahīṅ āegā, sharīr use ḳhāk meṅ nahīṅ milāeṅge.

²³us ke āge āge maiṅ us ke dushmanoṅ ko pāsh pāsh karūṅga. jo us se nafrat rakhte haiṅ unheṅ zamīn par paṭaḳh dūṅgā.

²⁴merī wafā aur merī shafqat us ke sāth raheṅgī, mere nām se wuh sarfarāz hogā.

²⁵maiṅ us ke hāth ko samundar par aur us ke dahne hāth ko daryāoṅ par hukūmat karne dūṅgā.

²⁶wuh mujhe pukār kar kahegā, ‘tū merā bāp, merā ḳhudā aur merī najāt kī chaṭān hai.’

²⁷maiṅ use apnā pahlauṭhā aur duniyā kā sab se ālā bādshāh banāūṅgā.

²⁸maiṅ use hameshā tak apnī shafqat se nawāztā rahūṅgā, merā us ke sāth ahd kabhī tamām nahīṅ hogā.

²⁹maiṅ us kī nasl hameshā tak qāim rakhūṅgā, jab tak āsmān qāim hai us kā taḳht qāim rakhūṅgā.

³⁰agar us ke beṭe merī sharīat tark karke mere ahkām par amal na kareṅ,

³¹agar wuh mere farmānoṅ kī behurmatī karke merī hidāyāt ke mutābiq zindagī na guzāreṅ

³²to maiṅ lāṭhī le kar un kī tādīb karūṅga aur mohlak wabāoṅ se un ke gunāhoṅ kī sazā dūṅgā.

³³lekin maiṅ use apnī shafqat se mahrūm nahīṅ karūṅga, apnī wafā kā inkār nahīṅ karūṅga.

³⁴na maiṅ apne ahd kī behurmatī karūṅga, na wuh kuchh tabdīl karūṅga jo maiṅ ne farmāyā hai.

³⁵maiṅ ne ek bār sadā ke lie apnī quddūsiyat kī qasam khā kar wādā kiyā hai, aur maiṅ dāūd ko kabhī dhokā nahīṅ dūṅgā.

³⁶us kī nasl abad tak qāim rahegī, us kā taḳht āftāb kī tarah mere sāmne khaṛā rahegā.

³⁷chāṅd kī tarah wuh hameshā tak barqarār rahegā, aur jo gawāh bādaloṅ meṅ hai wuh wafādār hai.” (silāh)

³⁸lekin ab tū ne apne masah kie hue ḳhādim ko ṭhukrā kar radd kiyā, tū us se ġhazabnāk ho gayā hai.

³⁹tū ne apne ḳhādim kā ahd nāmanzūr kiyā aur us kā tāj ḳhāk meṅ milā kar us kī behurmatī kī hai.

⁴⁰tū ne us kī tamām fasīleṅ ḍhā kar us ke qiloṅ ko malbe ke ḍher banā diyā hai.

⁴¹jo bhī wahāṅ se guzare wuh use lūṭ letā hai. wuh apne paṛosiyoṅ ke lie mazāq kā nishānā ban gayā hai.

⁴²tū ne us ke muḳhālifoṅ kā dahnā hāth sarfarāz kiyā, us ke tamām dushmanoṅ ko ḳhush kar diyā hai.

⁴³tū ne us kī talwār kī tezī beasar karke use jang meṅ fath pāne se rok diyā hai.

⁴⁴tū ne us kī shān ḳhatm karke us kā taḳht zamīn par paṭaḳh diyā hai.

⁴⁵tū ne us kī jawānī ke din muḳhtasar karke use ruswāī kī chādar meṅ lapeṭā hai. (silāh)

⁴⁶ai rab, kab tak? kyā tū apne āp ko hameshā tak chhupāe rakhegā? kyā terā qahr abad tak āg kī tarah bhaṛaktā rahegā?

⁴⁷yād rahe ki merī zindagī kitnī muḳhtasar hai, ki tū ne tamām insān kitne fānī ḳhalaq kie haiṅ.

⁴⁸kaun hai jis kā maut se wāstā na paṛe, kaun hai jo hameshā zindā rahe? kaun apnī jān ko maut ke qabze se bachāe rakh saktā hai? (silāh)

⁴⁹ai rab, terī wuh purānī mehrbāniyāṅ kahāṅ haiṅ jin kā wādā tū ne apnī wafā kī qasam khā kar dāūd se kiyā?

⁵⁰ai rab, apne ḳhādimoṅ kī ḳhajālat yād kar. merā sīnā muta'addid qaumoṅ kī lān-tān se dukhtā hai,

⁵¹kyūṅki ai rab, tere dushmanoṅ ne mujhe lān-tān kī, unhoṅ ne tere masah kie hue ḳhādim ko har qadam par lān-tān kī hai!

⁵²abad tak rab kī hamd ho! āmīn, phir āmīn.