Read Roman Urdu Geo zabūr 9 Bible Online

zabūr 9 - Roman Urdu Geo bible

zabūr 9

¹dāūd kā zabūr. mausīqī ke rāhnumā ke lie. tarz: alāmūt-labbīn. ai rab, maiṅ pūre dil se terī satāish karūṅga, tere tamām mojizāt kā bayān karūṅga.

²maiṅ shādmān ho kar terī ḳhushī manāūṅgā. ai allāh t'ālā, maiṅ tere nām kī tamjīd meṅ gīt gāūṅgā.

³jab mere dushman pīchhe haṭ jāeṅge to wuh ṭhokar khā kar tere huzūr tabāh ho jāeṅge.

⁴kyūṅki tū ne merā insāf kiyā hai, tū taḳht par baiṭh kar rāst munsif sābit huā hai.

⁵tū ne aqwām ko malāmat karke bedīnoṅ ko halāk kar diyā, un kā nām-o-nishān hameshā ke lie miṭā diyā hai.

⁶dushman tabāh ho gayā, abad tak malbe kā ḍher ban gayā hai. tū ne shahroṅ ko jaṛ se ukhāṛ diyā hai, aur un kī yād tak bāqī nahīṅ rahegī.

⁷lekin rab hameshā tak taḳhtnashīn rahegā, aur us ne apne taḳht ko adālat karne ke lie khaṛā kiyā hai.

⁸wuh rāstī se duniyā kī adālat karegā, insāf se ummatoṅ kā faislā karegā.

⁹rab mazlūmoṅ kī panāhgāh hai, ek qilā jis meṅ wuh musībat ke waqt mahfūz rahte haiṅ.

¹⁰ai rab, jo terā nām jānte wuh tujh par bharosā rakhte haiṅ. kyūṅki jo tere tālib haiṅ unheṅ tū ne kabhī tark nahīṅ kiyā.

¹¹rab kī tamjīd meṅ gīt gāo jo siyyūn pahāṛ par taḳhtnashīn hai, ummatoṅ meṅ wuh kuchh sunāo jo us ne kiyā hai.

¹²kyūṅki jo maqtūloṅ kā intiqām letā hai wuh musībatzadoṅ kī chīḳheṅ nazarandāz nahīṅ kartā.

¹³ai rab, mujh par rahm kar! merī us taqlīf par ġhaur kar jo nafrat karne wāle mujhe pahuṅchā rahe haiṅ. mujhe maut ke darwāzoṅ meṅ se nikāl kar uṭhā le

¹⁴tāki maiṅ siyyūn beṭī ke darwāzoṅ meṅ terī satāish karke wuh kuchh sunāūṅ jo tū ne mere lie kiyā hai, tāki maiṅ terī najāt kī ḳhushī manāūṅ.

¹⁵aqwām us gaṛhe meṅ ḳhud gir gaī haiṅ jo unhoṅ ne dūsroṅ ko pakaṛne ke lie khodā thā. un ke apne pāoṅ us jāl meṅ phaṅs gae haiṅ jo unhoṅ ne dūsroṅ ko phaṅsāne ke lie bichhā diyā thā.

¹⁶rab ne insāf karke apnā izhār kiyā to bedīn apne hāth ke phande meṅ ulajh gayā. (higgāyūn kā tarz. silāh)

¹⁷bedīn pātāl meṅ utreṅge, jo ummateṅ allāh ko bhūl gaī haiṅ wuh sab wahāṅ jāeṅgī.

¹⁸kyūṅki wuh zarūratmandoṅ ko hameshā tak nahīṅ bhūlegā, musībatzadoṅ kī ummīd abad tak jātī nahīṅ rahegī.

¹⁹ai rab, uṭh khaṛā ho tāki insān ġhālib na āe. baḳhsh de ki tere huzūr aqwām kī adālat kī jāe.

²⁰ai rab, unheṅ dahshatzadā kar tāki aqwām jān leṅ ki insān hī haiṅ. (silāh)