Read Roman Urdu Geo zabūr 90 Bible Online

zabūr 90 - Roman Urdu Geo bible

zabūr 90

¹mard-e-ḳhudā mūsā kī duā. ai rab, pusht-dar-pusht tū hamārī panāhgāh rahā hai.

²is se pahle ki pahāṛ paidā hue aur tū zamīn aur duniyā ko wujūd meṅ lāyā tū hī thā. ai allāh, tū azal se abad tak hai.

³tū insān ko dubārā ḳhāk hone detā hai. tū farmātā hai, ‘ai ādamzādo, dubārā ḳhāk meṅ mil jāo!’

⁴kyūṅki terī nazar meṅ hazār sāl kal ke guzare hue din ke barābar yā rāt ke ek pahar kī mānind haiṅ.

⁵tū logoṅ ko sailāb kī tarah bahā le jātā hai, wuh nīnd aur us ghās kī mānind haiṅ jo subh ko phūṭ nikaltī hai.

⁶wuh subh ko phūṭ nikaltī aur ugtī hai, lekin shām ko murjhā kar sūkh jātī hai.

⁷kyūṅki ham tere ġhazab se fanā ho jāte aur tere qahr se hawāsbāḳhtā ho jāte haiṅ.

⁸tū ne hamārī ḳhatāoṅ ko apne sāmne rakhā, hamāre poshīdā gunāhoṅ ko apne chehre ke nūr meṅ lāyā hai.

⁹chunāṅche hamāre tamām din tere qahr ke taht ghaṭte ghaṭte ḳhatm ho jāte haiṅ. jab ham apne sāloṅ ke iḳhtitām par pahuṅchte haiṅ to zindagī sard āh ke barābar hī hotī hai.

¹⁰hamārī umr 70 sāl yā agar zyādā tāqat ho to 80 sāl tak pahuṅchtī hai, aur jo din faḳhr kā bāis the wuh bhī taqlīfdih aur bekār haiṅ. jald hī wuh guzar jāte haiṅ, aur ham parindoṅ kī tarah uṛ kar chale jāte haiṅ.

¹¹kaun tere ġhazab kī pūrī shiddat jāntā hai? kaun samajhtā hai ki terā qahr hamārī ḳhudātarsī kī kamī ke mutābiq hī hai?

¹²chunāṅche hameṅ hamāre dinoṅ kā sahīh hisāb karnā sikhā tāki hamāre dil dānishmand ho jāeṅ.

¹³ai rab, dubārā hamārī taraf rujū farmā! tū kab tak dūr rahegā? apne ḳhādimoṅ par tars khā!

¹⁴subh ko hameṅ apnī shafqat se ser kar! tab ham zindagī bhar bāġh bāġh hoṅge aur ḳhushī manāeṅge.

¹⁵hameṅ utne hī din ḳhushī dilā jitne tū ne hameṅ past kiyā hai, utne hī sāl jitne hameṅ dukh sahnā paṛā hai.

¹⁶apne ḳhādimoṅ par apne kām aur un kī aulād par apnī azmat zāhir kar.

¹⁷rab hamārā ḳhudā hameṅ apnī mehrbānī dikhāe. hamāre hāthoṅ kā kām mazbūt kar, hāṅ hamāre hāthoṅ kā kām mazbūt kar!